२१ जेठ २०८३, बिहीबार
विराटनगर, २३ चैत– गत फागुन २६ गते मोरङको बेलवारी नगरपालिका १० को भाउन्ने जंगलमा एक महिला वेहोस अवस्थामा भेटिईन् । स्थानीयले त्यस बिषयमा प्रहरीलाई जानकारी गराए ।
वेलवारीको प्रहरी टोलीले तत्काल उद्धार गरी उपचारको लागि वीपी. कोइराला स्वास्थ्य बिज्ञान प्रतिष्ठान धरान पठायो । उपचारपछि ती महिलाको होस खुल्यो ।
सुनसरीको बराह नगरपालिकाकी ती महिलालाई त्यस्तो अवस्थामा पुर्याउनेको खोजीमा प्रहरी जुट्यो ।
अनुसन्धानका क्रममा प्रहरीले महिलाका श्रीमानले ७ वर्ष अगाडि दोस्रो विवाह गरेको तथ्य फेला पर्यो । श्रीमानले छाडेपछि होटलमा काम गर्ने ती महिलाको सम्पर्क सुनसरी जिल्ला बराहा नगरपालिका वडा नं. ७ का बेचु झाको छोरा वर्ष २३ को अजय झासँग हुन पुग्यो ।
झाले ती महिलालाई विवाहको प्रस्ताव राखे । श्रीमानले छोडेपछि एक्लै भएकी उनले त्यसलाई स्विकार गरिन् । विवाह गर्ने भन्दै महिलासँग झाले पटक पटक शारीरिक सम्पर्क गरे । महिला गर्भवती भइन् ।
विवाह गर्ने वाचा गरेर शारीरिक सम्पर्क गरेका झाले साथी सन्तोष तामाङसहितको सहयोगमा झापाको दमकमा डेरा खोजेको र उतै राख्छु भन्दै ती महिलालाई मोटरसाइकलमा राखेर लिएर हिँडे ।
दमकमा डेरा खोजेको छ भनेपछि उनी झासँगै गइन् । दकम लाने क्रममा महिलालाई मोरङको बेलवारी नगरपालिकाको भाउन्नेको जंगलमा लगियो । जहाँ उनीसँग विवाह गर्छु भन्दै गर्भवती बनाउने झाले साथीसँग मिलेर कुटपिट, लछारपछार गर्दै घाँटीमा सलले थिचेर अचेत अवस्थामा छोडेर भागेका थिए ।
अचेत अबस्थामा फेला परेकी उनको उपचार गराउने क्रममा पेटमा ७ महिनाको गर्भ रहेको थाहा भयो । तर गर्भमा रहेको बच्चाको पेटमै मृत्यु भएको चिकित्सकले रिपोर्ट दिए। उनका बाबु डोमाले ज्यान मार्ने उद्योग मुद्दामा जाहेरी दरखास्त दिएपछि प्रहरीले झा र तामाङको खोजी शुरु गरेको थियो ।
जिल्ला प्रहरी कार्यालय मोरङ र इलाका प्रहरी कार्यालय बेलबारीबाट खटिएको प्रहरी टोलिले खोजतलास गर्ने क्रममा पीडकलाई बिहीवार पक्राउ गर्न सफल भयो । उनीहरुलाई प्रहरीले आज सार्वजनिक गरेको छ । पक्राउ परेका अजय झालाई ज्यान मार्ने उद्योग, जबरर्जस्ती करणी र गर्भपतन अन्तर्गत म्याद थपगरी मुद्दा चलाउने तयारी भईरहेको जिल्ला प्रहरी कार्यालय मोरङका प्रहरी उपरीक्षक अरुण कुमार बिसीले जानकारी दिए ।
