२५ जेठ २०८३, सोमबार
काठमाडौं, २९ चैत– पूर्वप्रधानमन्त्री एवम् नयाँ शक्ति नेपाल पार्टीका संयोजक डा. बाबुराम भट्टराईले आफ्नो सुरक्षामा खटिएका सबै सुरक्षाकर्मी सरकारलाई फिर्ता गरेका छन् ।
करिब १२ वर्षदेखि सुरक्षा घेरमा रहँदै आएका डा. भट्टराईले बिहीवार सबै सुरक्षाकर्मी फिर्ता गरेका हुन् । अब उनी सुरक्षाकर्मी बिनै हिँड्ने छन् ।
भट्टराईले बिहीवार औपचारिक रुपमा आफ्नो सुरक्षामा खटिएको नेपाल प्रहरी र सशस्त्र प्रहरीको टुकुडीलाई बिदाइ गरेका हुन् । नयाँ शक्ति ठगन गर्नु अगाडि भट्टराईलाई सरकारले माओवादीको उच्च नेतृत्वको हैसियतमा सुरक्षा प्रदान गरिरहेको थियो ।
शान्ति प्रक्रियामा आएदेखि नै सुरक्षाकर्मीको घेरमा रहेका भट्टराईको सुरक्षाका लागि पछिल्लो समय सरकारले २९ जना सुरक्षाकर्मी खटाएको थियो ।
पूर्वप्रधानमन्त्रीको हैसियतामा भट्टराईको सुरक्षाका लागि नेपाल प्रहरीबाट निरीक्षक चन्द्र केसीको नेतृत्वमा १० र सशस्त्र प्रहरीका निरीक्षक प्रदीप पौडेलको नेतृत्वमा १९ जना गरी २९ जना सुरक्षाकर्मी तैनाथ थिए ।
