काठमाडौं २१ वैशाख– सिण्डिकेट पक्षधर यातायात व्यबसायीहरुले सवारी साधन नचलाएपनि काठमाडौंमा सडकमा ट्राफिक जाम देखिएको छ । 

अन्य दिनमा जस्तै काठमाडौंका कोटेश्वर, बानेश्वर, चाबहिल, कलंकी, सिंहदरबार लगायतका क्षेत्रका सडकमा जाम देखिएको हो । बिहान साढे ९ बजे कोटेश्वर–जडिबुटीको जाम भक्तपुरको लोकन्थलीसम्म पुगेको थियो । 

साझा, मयुर, मेट्रो सिटी र अन्नपूर्ण यातायातका बसमा खचाँखच यात्रुको भिड देखिएको छ । यसअघि चक्रपथ परिक्रमा गरेर बनेपा पुग्ने मयुरले आज रत्नपार्कसम्म सेवा दिएको छ ।  सरकारले आज क्यू फ्रि गरेको छ । 

सार्वजानिक बस नचलेपनि सडकमा निजी क्षेत्रका गाडी चलेका छन् । दुई पाङ्ग्रे सवारी साधन (मोटर साइकिल र स्कुटर)ले यात्रुहरुलाई ‘लिफ्ट’ दिएका छन् । 

२०७२ सालमा भारतले गरेको नाकाबन्दीको समयमा ‘लिफ्ट’को प्रचलन शुरु भएको थियो । अधिकाशं मोटर साइकिलको पछाडि यात्रु देखिएका छन् ।