काठमाडौं, २५ बैशाख- सरकारले आगामी एक दशकलाई उर्जा तथा जलस्रोत दशकका रुपमा अघि बढाउने घोषणा गरेको छ ।  ऊर्जा तथा सिञ्चाइमन्त्री वर्षमान पुनले मंगलबार मन्त्रालयको मार्गचित्र सार्वजनिक गर्दै २०७५ देखि २०८५ सम्मको दशकमा एकीकृत राष्ट्रिय जलस्रोत नीति बनाई उर्जामा आत्मनिर्भर बन्ने घोषणा गरेको हो ।  सरकारले प्रादेशिक सन्तुलन, माग र आपूर्ति, उत्पादन सम्मिश्रण तथा ऊर्जा सुरक्षा आदिलाई मध्यनजर गर्दै सम्भव भएसम्म हरेक प्रदेशमा कम्तिमा एउटा जलाशययुक्त आयोजना निर्माण गरिने पनि मार्गचित्रमा उल्लेख गरेको छ । 

वर्तमान अवस्थाको विद्युत उपभोग ढाँचामा क्रमशः परिवर्तन तथा ऊर्जा खपतको क्षेत्र विस्तार गर्दै प्रतिव्यक्ति विद्युत खपतलाई आगामी पाँच वर्षभित्र ७०० युनिट (किलोवाट घण्टा) र दश वर्षभित्र १५०० युनिट पु¥याइने पनि मार्गचित्रमा उल्लेख गरिएको छ । यस्तै यसका लागि घरायसी, सार्वजनिक एवम् निजी संस्था, यातायात र औद्योगिक क्षेत्रमा प्रयोग भइरहेका ऊर्जाका अन्य स्रोतहरुलाई विद्युत ऊर्जाले प्रतिस्थापन गर्ने गरी आवश्यक नीतिगत तथा कानूनी व्यवस्था गरिने पनि मार्गचित्रमा उल्लेख गरेको छ । 

मार्गचित्रले साथै, विद्युत ऊर्जा बढी खपत गर्ने उद्योग स्थापना एवम् विद्युतीय सवारी साधनहरु सञ्चालन गर्न जोड दिइने समेत उल्लेख गरेको छ ।