मोरङ, २६ बैशाख- आफैंलाई गोली हान्न लगाएको आरोपमा पक्राउ गरिएका आचार्य श्रीनिवासलाई प्रहरीले अर्कै मुद्दा चलाएको छ । धार्मिक तथा साम्प्रदायिक हिंसा फैलाउन खोजेको आरोपमा सोमबार पक्राउ परेका आचार्यलाई मंगलबार जिल्ला प्रहरी कार्यालय मोरङले हातहतियार तथा खरखजाना मुद्दा दर्ता गरेको छ ।

उक्त मुद्दामा उनलाई अनुसन्धानका लागि जिल्ला प्रशासन कार्यालय मोरङले १० दिनको म्याद दिएको छ । आचार्यलाई जिल्ला प्रहरी मोरङको हिरासतमा राखेर हातहतियार तथा खरखजाना मुद्दामा अनुसन्धान सुरु गरेको प्रहरी उपरीक्षक अरुणकुमार बीसीले बताए । जिल्ला प्रशासन कार्यालयले हेर्ने उक्त मुद्दामा आरोप प्रमाणित भए १ वर्ष कैद वा १ लाख जरिवाना वा दुवै सजाय हुन सक्ने कानुनी व्यवस्था छ । तर आचार्यमाथि गोली प्रहार भएको पेस्तोल प्रहरीले बरामद गर्न गर्न सकेको छैन । त्रिभुवन विमानस्थलबाट भारतको दिल्ली भाग्न लागेका आचार्यलाई विशेष प्रहरी अनुसन्धान टोलीले सोमबार विहान काठमाडौंस्थित अन्तर्राष्ट्रिय विमानस्थलबाट पक्राउ गरेर विराटनगर ल्याएको थियो ।

अधिवक्ता योगेन्द्र चौहानले आचार्यलाई लगाएको मुद्दामा हतियारसमेत प्रहरीले बरामद गर्न नसकेको अवस्थामा थुनछेक बहसमा छुट्न सक्ने सम्भावना बढी भएको बताए ।
प्रहरीले आचार्यमाथि धर्मको नाममा विध्वंस मच्चाउन खोजेको आरोपमा मुद्दा चलाउँदा उपयुक्त दण्डसजाय हुनेमा त्यस्तो हुन नसकेको अधिवक्ता चौहानले बताए । कान्तिपुर दैनिकमा खबर छ।