काठमाडौं, २७ बैशाख– प्रधानमन्त्री कार्यालयको निर्देशनपछि वीर अस्पतालले बिरामी र कुरुवाहरु आवतजावत गर्ने बाटोमा राखेको वेवारिशे शव व्यवस्थापन गरेको छ ।

अस्पतालको भुइँतलामा रहेको आकस्मिक कक्षको दायाँतर्फ इमर्जेन्सी एक्स–रे, ल्याब तथा ब्लड बैंक जाने बाटोमै शव राखिएको भेटिएपछि लोकान्तरले आज बिहान ‘वीर अस्पतालको चरम लापरवाही : ढोकैमा बेवारिसे शव, झस्किँदै हिँड्छन् बिरामी’भन्ने शिर्षकमा समाचार प्रकाशित गरेको थियो । 

लोकान्तरमा समाचार आएपछि वीर अस्पतालका निर्देशक भुपेन्द्र बस्नेतलाई टेलिफोन मार्फत तत्काल शव व्यवस्थापन गर्न निर्देशन दिएको प्रधानमन्त्री कार्यालयले जनाएको छ । 

प्रधानमन्त्री कार्यलयले लोकान्तरमा फोन गरेर वीर अस्पताललाई शव व्यवस्थापन गर्न निर्देशन दिइएको जानकारी दिएको हो । 

‘लोकान्तरमा समाचार प्रकाशन भएपछि हामीले तत्काल वीर अस्पतालका निर्देशकलाई फोन गरेर यसबारे जानकारी लियौं र शव व्यवस्थापन गर्न अनुरोध गरेका थियौं ।’ प्रधानमन्त्री कार्यलयका अधिकारीले लोकान्तरलाई भने,‘वेवारिसे शवलाई त्यहाँबाट टिचिङ अस्पतालमा व्यवस्थापन गरीएको छ ।’

बुधबार दिउँसो दुईजना व्यक्तिले काठमाडौंमा बस्दै आएका विराटनगरका राजकुमार महर्जनलाई वीर अस्पतालको आकस्मिक कक्षमा ल्याएर छाडिदिएका थिए । अस्पतालमा वेबारिसे बनेका उनको कलेजोमा देखिएको समस्याका कारण बुधबार साँझ नै मृत्यु भएको थियो ।

अस्पतालका आकस्मिक सेवा विभागका प्रमुख डा. भोलाराम श्रेष्ठले सो शव बेवारिसे रहेको र अन्यत्र राख्ने ठाउँ नहुँदा त्यहीँ राखेको बताएका थिए । 

वीर अस्पतालका निर्देशक भुपेन्द्र बस्नेतले आफुलाई प्रधानमन्त्री कार्यलयबाट वेवारिसे शव व्यवस्थापन गर्न निदेर्शन आएको र शव केही समय अघि व्यवस्थापन गरीएको बताएका छन् ।