१६ असार २०८३, मंगलबार
जनकपुर, २८ वैशाख– भारतीय प्रधानमन्त्री नरेन्द्र मोदी बिहान १० बजे भारतीय वायुसेवाको हेलिकप्टरबाट विमानस्थलमा अवतरण गर्ने कार्यक्रम सार्वजनिक गरिएको थियो । तर उनी १० बजेर ४५ मिनेट जाँदा एयर इंडियाको विशेष जहाज एटीआर ७२/६०० बाट अवतरण गरे ।
यसअघि मोदी दिल्लीबाट पटना गएर त्यहाँबाट हेलिकप्टर मार्फत आउने चर्चा चलिरहेको थियो । तर सबैको अनुमान विपरित उनी एयर इन्डियाको जहाजबाट जनकपुर विमानस्थलमा अवतरण गरेका थिए ।
सबै ओर्लिए मोदी ओर्लिएनन् !
बिहान १० बजेर ४५ मिनेट जाँदा जनकपुर विमानस्थलमा अवतरण गरेको एयर इन्डियाको उक्त जहाजबाट पहिला भारतीय सुरक्षा अधिकारीहरू, नेपालका लागि भारतीय राजदूत मञ्जिव सिंह पुरी लगायतका अधिकारीहरु ओर्लिएका थिए र जहाजको ढोका बन्द भएको थियो ।
जहाजको अवतरणसँगै बिछ्याइएको रातो कार्पेटमा स्वागत गर्नेहरू लाइन लागेर उभिएपछि त्यो जहाज अन्त कतै सर्ला र मोदी चढेको हेलिकप्टर आउला भनेर मिडियाकर्मीहरूले मोदी आउने हेलिकप्टर कुरिरहेका थिए ।
तर जहाजको पछिल्लो ढोका पुनः खुल्यो र त्यसमा मोदी झुल्किए । त्यसपछि रक्षा मन्त्री ईश्वर पोख्रेल र दुई नम्बर प्रदेशका मुख्यमन्त्री लालबाबु राउत झुल्किए । अनि पालैपालो मोदीलाई फूल र माला लगाएर स्वागत गरे ।
करिब आधा घन्टा ढिलो अवतरण गरेका मोदी त्यसलगत्तै नेपाल र भारतको झण्डा राखिएको विशेष गाडीमा सवारी भएर जनकपुरस्थित रामजानकी मन्दिर पुगेका छन् । उनलाई त्यहाँ प्रधानमन्त्री केपी ओलीले दोसल्ला ओढाएर स्वागत गरेका थिए । त्यसपछि पुजा अर्चना शुरु भएको छ ।
