१८ असार २०८३, बिहीबार
काठमाडौं, ३१ वैशाख– प्रधानमन्त्री नरेन्द्र मोदीको भ्रमणको क्रममा जानकी मन्दिरमा राखिएको नेपालको झण्डाको स्वरुप विगारेको भन्दै संघीय मामिला तथा सामान्य प्रशासन मन्त्रालयले स्पष्टिकरण माग गरेको छ ।
संघीय मामिला मन्त्री लालबाबु पण्डितले राष्ट्रि झण्डाको स्वरुप विग्रनु गम्भीर गल्ती भएको भन्दै प्रदेश दुईका अधिकारीहरुसँग स्पष्टिकरण माग गरेका हुन् । प्रदेश दुईका मुख्यसचिवसहितका अधिकारीहरुलाई स्पष्टिकरण माग गरिएको हो ।
मन्त्री पण्डितका स्वकीय सचिव वसिम आलका अनुसार नेपाली झण्डाको स्वरुप र आकार किन फरक प¥यो भनेर चार सरकारी निकायका अधिकारीहरुलाई तीन दिने स्पष्टिकरण माग गरिएको छ ।
मन्त्रालयले २ नम्बर प्रदेशका निमित्त मुख्यसचिव हरि फुयाँल, २ नम्बर प्रदेशका आन्तरिक मामिला तथा कानून मन्त्रालयका सचिव देवीराम भण्डारी, धनुषाका प्रमुख जिल्ला अधिकारी गोपाल पराजुली र जनकपुर उपमहानगरपालिकाका कार्यकारी अधिकृत मदन भण्डारीलाई सोमबारको मन्त्री स्तरीय निर्णयबाट स्पष्टिकरण सोधिएको हो ।
मन्त्रालयले उनीहरुलाई जानकी मन्दिरमा नेपालको राष्ट्रिय झण्डा, नेपालको संविधान २०७२ को अनुसूची–१ मा उल्लेख भएअनुसार आकार र रुपमा नभई फरक आकार र रुपमा देखिन आएको र निर्धारित स्वरुपभन्दा फरक आकार भएको झण्डा बनाउन किन दिइयो भनेर सोधेको छ।
यस अघि सोमबार(आज) बसेको संघीय संसद बैठकमा सांसदहरुले जनकपुरमा नेपाली झण्डाको स्वरुप विगारेको भन्दै आपत्ति जनाएका थिए । सामाजिक सञ्जालहरुमा पनि नेपालको झण्डा विगारेको भन्दै प्रदेश सरकारको आलोचना भइरहेको छ ।
