२६ जेठ २०८३, मंगलबार
विराटनगर, १३ जेठ– विराटनगर महानगरपालिका वडा नम्बर ११ मा सडक विस्तारअन्तर्गत बाटाे खनिरहेकाे एक्साभेटर (जेसीबी)का चालकलाई होटल संचालकले कुटपिट गरेका छन् । महानगरपालिकाको एकीकृत वातावरणीय सुधार परियोजना अन्तरगतको आशिष निर्माण सेवा कम्पनीका जेसीबी चालकलाई आफ्नो होटल अगाडी बाटो भत्काएको भन्दै एभरेष्ट इन होटलका संचालक अर्जुन साहले रड प्रहार गरेको स्थानीयले बताएका छन् ।
काम गरिरहेको बेलामा एक्कासी आएर २ झापड हानेर रड प्रहार गर्न खोज्दा आफू भागेर बाँचेको जेसीबीका चालक मोहम्मद जुबेरले बताए । होटल संचालक अर्जुन साहले यस अघि पनि पटक पटक होटल अगाडीको काम रोक्दै आएका थिए ।
सडक विस्तारका क्रममा उनकाे हाेटेलेका अगाडिकाे पर्खाल भत्काउनु पर्ने थियाे । महानगरपालिकाले सडकमा पर्ने संरचना हटाउन हाेटल सञ्चालकलार्इ समय सीमा पनि ताेकेकाे थियाे । दिइएकाे समय सीमा नाघे पछि अाइतवारदेखि होटल अगाडिकाे बाटाे बिस्तार गर्न मजदुर परिचालन गरिएकाे िथयाे ।
कामदारमाथि भएको आक्रमण लगत्तै एभरेष्ट होटेलका संचालक साहलाई प्रहरीले पक्राउ गरेको छ । उनलाई छलफलको लागि भन्दै वडा प्रहरी कार्यालय लगिएको छ । उनलाई पक्राउ गरेको समयमा महानगरपालिका वडा नम्बर ११ का वडा अध्यक्ष समेत होटलमा पुगेका थिए ।
मजदुरमाथि भएको हातपातको बिरोधमा आशिष निर्माण कम्पनीले त्यो क्षेत्रको काम रोको छ । घटना भएको स्थान जिल्ला शिक्षा कार्यालय नजिकै हो ।
तर होटल संचालक साहले भने अाफू उच्च रक्तचापकाे बिरामी भएका कारण रिस थाम्न नसकेपछि घटना हुन पुगेका बताएका छन् ।
