विराटनगर, २७ जेठ– राष्ट्रिय जनता पार्टी (राजपा) अध्यक्ष मण्डलका नेता राजेन्द्र महतोले संविधान संशोधन लगायतका माग सम्वोधन नगर्दासम्म सरकारमा जाने बिषयमा सोच्न नसकिने बताएका छन् । 

विराटनगर विमानस्थलमा सञ्चारकर्मीसँग कुरा गर्दै महतोले सरकारमा जाने विषयमा बिभिन्न चरणमा छलफल भइरहेको बताएका हुन् । तर माग सम्बोधन नहुँदासम्म सरकारमा जाने बारेमा कुनै धारणा नबनेको उनले स्पष्ट पारे ।  सरकारमा जाने बिषयमा छलफल भएपनि मन्त्रालयको बिषयमा कुराकानी नभएको उनले बताए । 

‘सरकारलाई राजपाले समर्थन गरेकै छ त्यसमा अब हाम्रो मागको बिषयमा सरकारले कसरी सम्बोधन गर्छ त्यो पर्खिएर बसेका छौ, महतोले भने । 

सरकारलाई समर्थन गरेपछि सरकारका तर्फबाट पनि काम भएमात्र सरकारमा जाने वातावरण बन्ने उनको भनाइ छ । 

उनले मधेशमा भएको ६ महिनाको कठोर आन्दोलनलाई देखाउने दाँतको रुपमा संज्ञा नदिन समेत आग्रह गरे । 

अहिले पनि संविधान संशोधन, कार्यकर्तालाई लगाएको झुठा मुद्द फिर्ता, आन्दोलनकारीहरुलाई जेलमा हालिएका बिषयहरुलाई सरकारले सम्बोधन नगरेको उनको भनाइ छ ।