काठमाडौं, १३ असार– गृहमन्त्री रामबहादुर थापा बादलले साढे ३३ किलो सुन तस्करीको छानविनमा उच्च निकायका व्यक्ति तानिन सक्ने बताएका छन् । उनले समयमा काम पूरा नगर्ने ठेकेदारलाई पनि कानूनको दायरामा ल्याइने बताए । 

प्रतिनिधि सभाको बैठकमा विनियोजन विधेयक माथिको छलफलका क्रममा उठेका प्रश्नको जवाफ दिने क्रममा मन्त्री थापाले सुन तस्करीको अनुसन्धान जारी रहेको र भविष्यमा उच्च तहका पात्र पनि तानिन सक्ने बताएका हुन् ।

‘सुन तस्करी प्रकरणमा उच्च निकायका व्यक्ति किन कानूनको घेरामा आएनन् भन्ने प्रश्न छ, जहाँसम्म अनुसन्धान पुगेको छ, अनुसन्धान जारी छ । भविष्यमा उच्च तहका पात्र कानूनको घेरामा आउन सक्छन्’ मन्त्री थापाले भने । 

नेमकिपाका सांसद प्रेम सुवालले सुन तस्करीमा उच्च राजनीतिक संलग्नता छ कि छैन? भनि सोधेको प्रश्नमा मन्त्री थापाले उच्च पात्र कानूनको घेरामा आउन सक्ने बताएका हुन् । तर उनले यसवारेमा धेरै बोलेनन ।

पहुँचवाला ठेकेदारलाई कारवाही गर्न कुन शक्तिले रोक्या ?

गृहमन्त्री थापाले समयमा काम पूरा नगर्ने ठेकेदारलाई कारवाही गर्ने बताए । ‘क्षेत्राधिकारको हिसावले यो भौतिक योजना मन्त्रालयको जिम्मेवारी हो । भौतिक मन्त्रालयसंगको समन्वयमा सरकारी काम अलपत्र पारेका ठेकेदारमाथि कानुन सम्मत कार्वाही हुन्छ’ मन्त्री थापाले भने । 

जिल्लाका ठेकेदारलाई कारवाही गरेपनि काठमाडौंका पहुँचवाला ठेकेदारलाई कारवाही गर्न कुन शक्तिले रोकेको हो ? भन्ने सांसद विमल श्रीवास्तवको प्रश्नमा गृहमन्त्री थापाले काम नगर्ने त्यस्ता ठेकेदारमाथिको कारवाही जारी रहेको बताए । उनले त्यस्तो कारवाही कानून सम्मत हुने पनि प्रष्ट पारे ।