०४ असार २०८३, बिहीबार
भारतमा शनिवारदेखि शुरु हुने दक्षिण एशियाली मुलुकका सभामुखहरुको सम्मेलनमा भाग लिन सभामुख ओनसरी घर्ती शुक्रबार इन्दौर जाँदैछिन् ।
घर्ती शुक्रबार बिहान एयर इन्डियाको फ्लाइटबाट नयाँ दिल्ली हुँदै इन्दौर जाने कार्यक्रम रहेको छ । सभामुख भएपछि घर्तीको यो पहिलो औपचारिक भारत भ्रमण हो ।
दीगो विकासको लक्ष्य प्राप्तीका बारेमा दक्षिण एशियाली मुलुकहरुको भुमिकाका बारेमा छलफल हुने सो सम्मेलनमा घर्तीले नेपालको प्रयास तथा उपलब्धिका बारेमा बोल्ने कार्यक्रम रहेको छ । भारतीय लोकसभा स्पिकर सुमित्रा महाजनको निमन्त्रणामा घर्ती सम्मेलनमा सहभागी हुनलागेकी हुन् ।
सम्मेलनमा बंगलादेश, श्रीलंका,म्यानमार,माल्द्धिभ्स,भुटान,अफगानिस्तान लगायतको मुलुकका सभामुखहरु सहभागी हुने कार्यक्रम रहेको छ । त्यस्तै पछिल्लो समयमा भारत र पाकिस्तानबीचको तनावले दुइ मुलकबीच उत्पन्न तिक्तताका कारण पाकिस्तानका तर्फबाट भने सहभागिता नरहने भारतीय संचारमाध्यमहरुले जनाएका छन् ।
तीन दिने सम्मेलनकालागि भारत आउन लागेकी घर्तीको आइतबार काठमाडौं फर्किने कार्यक्रम रहेको छ । इण्डियन पार्लियामेन्टरी युनियन तथा पार्लियामेन्ट अफ इन्डियाको संयुक्त आयोजनामा हुन लागेको सम्मेलन तीन दिन सम्म चल्नेछ । यस अघि सन् २०१६मा सो सम्मेलन बंगलादेशले आयोजना गरेको थियो ।
