काठमाडौैँ सरकारले जनताको दैनिक जीवनसँग जोडिएका आम सरोकारका विषयमा ध्यान नदिएको गुनासा आई रहेका बेला सडकका खाल्डाखुल्डी पुर्न, बजार अनुगमन गर्न र कालोबजारी रोक्ने जस्ता विषयमा तत्काल काम थाल्न आइतबार निर्देशन दिएको र त्यसको केही परिणाम आउन थालेको छ । । 
सोही निर्देशनअनुरुप अहिले राजधानीका सडकहरूमा खाल्डाखुल्डी पुर्ने तथा फोहर तत्कालै उठाउने कुरामा काम शुरु भएको छ ।  प्रधानमन्त्री कार्यालयमा आइतबार बसेको केन्द्रीय अनुगमन समितिको बैठकले जनसरोकारसँग जोडिएका विषयहरूलाई तुरुन्त सम्बोधन गर्न सात बुँदे निर्देशन दिएको थियो । साथै, सम्बन्धित मन्त्रालयलाई दिएका निर्देशनहरूको कार्यान्वयनसम्बन्धी प्रगतिको विवरण १५ दिनभित्र पठाउन निर्देशन दिएको छ । प्रगतिको विवरण प्रधानमन्त्री तथा मन्त्रिपरिषद्को कार्यालयमा पठाउनुपर्ने छ । 
प्रधानमन्त्री कार्यालयका प्रवक्ता बिनोदबहादुर कुँवरले विभिन्न मन्त्रालय र निकायलाई दिएका निर्देशनको प्रगतिको लिखित विवरण माग गरिएको बताए  । उनका अनुसार, सम्बन्धित मन्त्रालय र निकायले आफूले चालेका कदमबारे अहिले मौखिकरूपमा के प्रगति भएको छ भन्ने जानकारी दिन थालेका छन् । 
समितिले बजारमा अति आवश्यक उपभोग्य वस्तुहरूको आवश्यक मौज्दातको व्यवस्था सुदृढ बनाउन तथा गुणस्तरयुक्त उपभोग्य वस्तुको सहज र सर्वसुलभ आपूर्तिको व्यवस्था मिलाउन निर्देशन दिएको छ ।  आजको गोरखापत्र दैनिकमा खबर छापिएको छ ।