३१ जेठ २०८३, आइतबार
काठमाडौं – एक कुकुरको मृत्युपछि इटलीका मानिस दुःखी छन् । सामाजिक सञ्जालमा मानिसहरू उससँग जोडिएका यादहरू शेयर गरिरहेका छन् ।
कुकुरका मालिकले फेसबूकमा काओस कुकुरको मृत्यु भएको जानकारी दिएपछि लाखौं मानिसले दुःख व्यक्त गरे ।
फेसबूक पोस्टलाई ६६ हजार मानिसले शेयर गरेर कुकुरलाई श्रद्धाञ्जलि दिए ।
कुकुरका मालिक फाबियानो इटोरको मृत्यु कसैले विष खुवाएको कारण भएको हो भन्छन् ।
इटोरले भावुक भएर लेखे, ‘स्वर्गमा पनि आफ्नो काम जारी राख्नू । हराएका मानिसलाई खोजिरहनू र जिन्दगीहरू बचाइरहनू ।’
काओसले सन् २०१६ को अगस्टमा इटलीमा आएको भूकम्पका बेलामा अनेकौं मानिसको ज्यान बचाएको थियो ।
उक्त भूकम्पमा परी धेरै मानिस मरेका थिए । अनेकौं घर पूरै भत्किएका थिए । ती घरमा थिचिएका मानिसलाई काओसले खोजेर निकालेको थियो ।
त्यसपछि इटलीका मानिसले उसलाई हिरो डग भनेका थिए ।
शनिवार इटोरले फेसबूकमै आफ्नो कुकुर हराएको जानकारी दिएका थिए । उनले कुकुरका बारेमा जानकारी दिन मानिसहरूलाई आह्वान गरेका थिए ।
त्यसको केही घन्टाभित्र काओसको मृत्युको सूचना उनले फेसबूकमा पोस्ट गरे ।
उनले लेखे, ‘तिमीले रातदिन मेहनत गरेका थियौ । तिमी एक बफादार मित्र थियौ । मेरा मित्र, दौड । नरोकिऊ ।’
बीबीसीबाट
