काठमाडौं– उत्तर तर्फको गेट खुल्ला छ । जो कोही प्रवेश गरेपनि सोध्ने कोही छैन । 

गेटको छेउँमै दुई वटा टिनका टहरा छन् । टिन भित्र पाँच÷सात जना युवाहरु तास खेलिरहेका देखिन्थे । अर्को टहरामा साउथ इण्डियन फिल्म हेरिरहेका ४ जनाको अर्को युवा जमात थियो ।

“रमाइलो छ है” प्रश्न गर्दा ५ जना युवाहरु पुर्लुक्क म तिर हेरे फेरि आफ्नै धुनमा लागे उनीहरु । अर्को टहरामा पनि छिर्दा फिल्ममा मस्त कसैलाई पत्तो भएन को आयो गयो । 

वरिपरि पाँच फिटसम्मको पुराना फाउन्टेनहरु त्यही घाँसमा विलाउन लागेका थिए । ढुङ्गाले निमार्ण शुरु गरेका काम अलिअलि देखिन्थ्यो । 

बीचमा आधाआधी निमार्ण गर्दै गर्र्दा रोकिएको बालगोपालेश्वर मन्दिरले घण्टाघरको पृष्ठभुमी बनाएर ङिच्च दाँत देखाएर बसेको थियो । दक्षिण पट्टी एउटा सनो घर छ । सँगै अलि पर शान्ति बाटिका अनी सँगै महानगरिय प्रहरी आयुक्तको कार्यलय । 

कुनैै बेलामा आफ्नो छोराको मृत्यु पछि रानीलाई मन भुलाउन प्रताप मल्लले निमार्ण गरेको रानीपोखरी अहिले घाँसैघाँसले भरिएको छ । 

२०७२ को विनाशकारी भूकम्पले क्षती पुग्नु भन्दा पहिला पानीले भरी भाउन रानीपोखरी अहिले कुरुप बनेको छ । 

पुनर्निर्माण विवादका कारण निर्माण शुरु भएको लामो समय भइसक्दा पनि यसले गति लिन सकेको छैन । रानीपोखरीको यो अवस्थाले समग्र देशमा भूकम्पछिको पुनर्निर्माणलाई मात्र होइन् देशको दुरावस्थालाई नराम्ररी गिज्याइरहेको छ ।