२३ असार २०८३, मंगलबार
काठमाडौं– आइतवार साँझ अपहरण गरी हत्या गरिएका काठमाडौं काँडाघारीका ११ वर्षीय निशान खड्काको दाहसंस्कार गरिएको छ ।
रोजगारीका लागि मलेसियामा रहेका बुवा गोपाल आएपछि बिहीवार निशानको दाहसंस्कार गरिएको हो । निशानलाई हजुरबुवा दूर्गाबहादुर खड्काले दागबत्ती दिए ।
आइतवार साँझ अपहरणमा परेका निशानको सोही राति हत्या भएको थियो । प्रहरीले सोमवार मात्रै भक्तपुरको सानोठिमीस्थित एक निर्माणाधिन घरको जगमा गाडिएको अवस्थामा निशानको शव फेला पारेको थियो ।
त्रिवि शिक्षण अस्पतालमा पोस्टमार्टम पछि बिहीवार निशानको शव आफन्तले बुझेका थिए ।
पोस्टमार्टममा अपहरणकारीले निशानको मुखमा रुमाल र कपडा कोचेर हत्या गरेको देखिएको छ । खड्काका घाँटीभित्र एक मिटर लामो रुमाल घुसाएर निर्ममतापूर्वक निशानको हत्या गरेको भेटिएको पोस्टमार्टममा संलग्न त्रिवि शिक्षण अस्पतालका चिकित्सकहरुले जनाएका छन् ।
अपहरणमा संलग्न गोपाल र अजय तामाङलाई सोमबार प्रहरीले भक्तपुरमा इन्काउन्टर गरेको थियो ।
