काठमाडौं– कालीमाटी फलफूल तथा तरकारी बजार अनुगमनका लागि पुगेको टोलीलाई व्यापारीले चार घण्टा थुनेका छन् । तरकारी बजारको अनुगमन गर्ने क्रममा दुईवटा ट्रक नियन्त्रणमा लिएपछि व्यवसायी तथा विचौलियाको समूहले अनुगमन टोलीलाई थुनेको हो । 

वाणिज्य, आपूर्ति तथा उपभोक्ता संरक्षण विभागको अनुगमन टोली सोमबार बिहान ३ बजे अनुगमनका लागि पुगेको थियो । टोलीलाई प्रहरीले 'स्कटिङ' गरेर बजारबाट बाहिर निकालेको थियो । 

अनुगमनका क्रममा टोलीले तरकारी बजारबाट दुईवटा ट्रक नियन्त्रणमा लिएको छ । उपत्यका बाहिरबाट फर्सी र काक्रो लिएर आएका दुई ट्रकसँग बिलविजकलगायतका कागजात नभेटिएपछि नियन्त्रणमा लिएको केन्द्रीय अनुगमन समितिका सदस्य माधव तिमिल्सिनाले जानकारी दिए ।

उनले भने, बजार अनुगमनका क्रममा अवरोध भयो । हामीलाई चार घण्टासम्म बाहिर निस्कन दिइएन ।’ उनले प्रहरीको सुरक्षामा चारघण्टापछि बाहिर निस्किएको लोकान्तरलाई बताए । अनुगमनमा अवरोध गर्ने र हुलहुज्जत गर्नेलाई कारबाही हुनु पर्ने उनले बताए । टोलीले पसल तथा सवारीहरुको अनुगमन गरेको थियो । 

तरकारीमा बिचौलियाको उपस्थिति शून्यमा झार्ने लक्ष्यसहित टोली विभिन्न स्थानबाट कसरी तरकारी भित्रन्छन् भन्ने सम्बन्धमा अनुगमनका लागि त्यहाँ पुगेको हो । 

पछिल्लो समय तरकारीको मूल्य अस्वभाविक महंगिएपछि केही दिनअघि आपूर्ति विभागको टोली धादिङ, चितवन, मकवानपुर लगायतका तरकारी उत्पादन हुने स्थान पुगेर अनुगमन गरेर फर्केको तिमिल्सिनाले बताए । किसानले पनि वास्तविक मूल्य नपाउने र उपभोक्ताले पनि बढी मूल्य तिर्नुपर्ने अवस्था अन्त्य गर्न अनुगमन गर्नु परेको उनको भनाइ छ ।