महेन्द्रनगर– १३ वर्षीया बालिकाको बलात्कारपछि हत्यामा संलग्नलाई सार्वजनिक गरी कारबाहीको माग गर्दै स्थानीयले शुरु गरेको आन्दोलनमा प्रहरीले चलाएको गोली लागेर कञ्चनपुरमा १ जनाको मृत्यु भएको छ । 

वास्तविक बलात्कारीलाई बचाउन मानसिक सन्तुलन ठीक नभएका व्यक्तिलाई अभियुक्तको रुपमा सार्वजनिक गरेको भन्दै मंगलवारदेखि शुरु भएको आन्दोलनले बिहीवार उग्र रुप लिएको थियो । 

बिहीवार प्रहरीले प्रदर्शनकारीमाथि गोली चलाउँदा १० जनाभन्दा बढी घाइते भएका थिए । 

गृह मन्त्रालयले घटनाको छानबिन गर्न भन्दै सह–सचिव हरीप्रसाद मैनालीको संयोजकत्वमा ५ सदस्यीय समिति गठन गरेको छ । समिति कञ्चनपुर पुगेर छानबिन शुरु गरिसकेको भनिएको अवस्थामा शुक्रवार पनि आन्दोलन जारी रह्यो । 

प्रहरीले शुक्रवार पनि आन्दोलनकारीमाथि गोली चलाउँदा एक बालकको ज्यान गएको छ । प्रहरीको गोलीले बालकको ज्यान गएपछि कञ्चनपुर झन तनावग्रस्त भएको छ । 

जिल्ला प्रशासन कार्यालय कञ्चनपुरले शान्तिसुरक्षा कायम राख्न भन्दै शुक्रवार साँझ ८ बजेदेखि अर्को आदेश नभएसम्मका लागि निषेधाज्ञा (कर्फ्यू) जारी गरेको छ । 

एम्बुलेन्समा तोडफोड, १० भन्दा बढी घाइते   

शुक्रवार साँझ आन्दोलनमा घाइते भएकाहरुलाई बोकेर उपचारका लागि अस्पताल लैजाँदै गरेको अवस्थामा एक एम्बुलेन्समाथि तोडफोड भएको छ । प्रहरीको घेर तोडेर अगाडि बढेपछि सुरक्षाकर्मीले एम्बुलेन्समाथि लाठी बर्साएको स्थानीयले आरोप लगाएका छन् । यद्यपि प्रहरीले उक्त आरोप अस्वीकार गरेको छ । 

शुक्रवार प्रहरीको गोली लागेर १० जनाभन्दा बढी प्रदर्शनकारी घाइते भएका छन् । घाइते भएकामध्ये ३ जनाको अवस्था गम्भीर छ । गम्भीर ३ जनालाई महाकाली अञ्चल अस्पतालमा उपचार हुन नसकेपछि धनगढीस्थित सेती अञ्चल अस्पतालमा रेफर गरिएको छ । 

मुख्यमन्त्रीको निवास अगाडि नाराबाजी

कञ्चनपुरमा बालिकाको बलात्कारपछि हत्यामा संलग्नलाई कारबाहीको माग गर्दै आन्दोलन गरेकामाथि प्रहरीले गोली चलाएको विरोधमा ७ नम्बर प्रदेशका मुख्यमन्त्रीको समेत विरोध भएको छ । 

७ नम्बर प्रदेशको अस्थायी राजधानी धनगढीस्थित मुख्यमन्त्रीको निवास अगाडि स्थानीयहरुले नाराबाजी शुरु गरेका छन् ।