१८ असार २०८३, बिहीबार
काठमाडौं– दक्षिण कोरियासँग संयुक्त सैन्य अभ्यास पुन थाल्ने विषयमा अमेरिकी अधिकारीहरूका फरकफरक धारणा बाहिर आएका छन् ।
अमेरिकी राष्ट्रपति डोनल्ड ट्रम्पले दक्षिण कोरियासँग संयुक्त सैन्य अभ्यास पुन थाल्नुपर्ने कुनै कारण आफूले नदेखेको बताएका छन् । यसअघि रक्षामन्त्री जेम्स म्याटिसले यो साताको शुरुमा संयुक्त सैन्य अभ्यास पुनः शुरु हुनसक्ने संकेत गरेका थिए ।
यसले दक्षिण कोरियासँग संयुक्त सैन्य अभ्यासका बारेमा अमेरिकी उच्चअधिकारीबीच नै समान धारणा नभएको देखाएको छ । उनले दक्षिण कोरियासँगको संयुक्त सैन्य अभ्यासहरूमा पुन ठूलो लगानी गर्नुको कुनै तुक नरहेको पनि बताएका छन् । ट्रम्पको यो पछिल्लो घोषणाले पेन्टागनका उच्च अधिकारीहरूलाई अचम्मित पारेको छ ।
कोरियाली प्रायद्वीपमा हुने सैन्य अभ्यास उत्तर कोरियाका लागि लामो समयदेखि झिँझोको विषय बन्दै आएको छ । प्योङयाङको परमाणु कार्यक्रमबारे संयुक्त राज्य अमेरिका र उत्तर कोरियाबीचको वार्तामा गतिरोध आएको ठानिएको छ । तर अमेरिकी राष्ट्रपति डोनल्ड ट्रम्पले भने आफ्नो सम्बन्ध उत्तर कोरियाली नेता किम जङ अनसँग न्यानो नै रहेको भन्दै ट्वीट गरेका छन् ।
