न्यूयोर्क,२९ मंसिर– अमेरिकाको एटलान्टा चिडियाघरमा शेरको नक्कली कपडा लगाएर खेल्दै गरेको बालक र साँच्चिकै जंगली शेर एक आपसमा खेल्दै गरेको अनौठो दृश्यले सबैलाई आश्चर्यमा पार्छ ।
उक्त दृश्यमा शेरको नक्कली कपडा लगाएका बच्चा जंगली शेरसँग खेल्दै, रमाउँदै गरेको भिडियो बच्चाको आमाबाबुले सामाजिक सञ्जालमा अपलोड गरेका थिए ।
डेलीमेलको रिपोर्टका अनुसार बच्चाका पिताले आफ्नो परिवारका साथमा चिडियाघरमा जाँदा आफ्ना ११ महिनाको सानो बालकलाई पनि शेरको कपडा लगाएर लगेका थिए ।
उक्त भिडियोमा बच्चाले शेरझै देखिने नक्कली कपडा लगाएर चिडियाघरको सीसा बाहिर बसेर सीसा भित्रको जंगली शेरलाई जिस्काउँदै खेल्दै गरेको देखिन्छ ।
शेर र बच्चाले एक अर्काको नक्कल गर्दै सँगै उठ्ने र बस्ने गरेको दृश्य निकै अनौठो छ । बच्चाको आमाबाबुले बच्चा शेरसँग जिस्किँदै खेलेको पूरै भिडियो रेकर्ड गरेका थिए । एजेन्सी
