काठमाडौं, १५ फागुन — जिल्ला प्रहरी कार्यालय रुपन्देहीले युवा संघ रुपन्देहीका अध्यक्ष दुर्गा तिवारीको हत्यामा संलग्नलाई आइतवार सार्वजनिक गरेको छ । उनीहरूले कसरी योजनाबद्ध तरिकाले तिवारीको हत्या गरे भन्ने विषय पनि प्रहरीले पत्रकार सम्मेलन गरेर जानकारी गराएको छ ।
गत पुस ४ गते दिउँसो रुपन्देहीको देवदहमा तिवारीको गोली हानी हत्या गरिएको थियो । उनको देवदह मेडिकल कलेजमा उपचार गर्दागर्दै ज्यान गएको थियो ।
हत्या यसरी भयो४० वर्षका तिवारी लु २५ प ८४४१ नम्बरको मोटरसाइकल चलाएर खुशी पौडेलसँग देवदह नगरपालिकाको कार्यालयतर्फ गइरहेका थिए । सोहीबेला यकिन हुन नसकेको पल्सर मोटरसाइकलबाट पछ्याइरहेका दुईजनाले तिवारीमाथि गोली हानेका थिए । मोटरसाइकलको पछाडि बस्नेले तिवारीलाई गोली हानेका थिए ।
रुपन्देहीका डिएसपी बेलबहादुर पाण्डेका अनुसार घटना भइसकेपछि प्रहरीले आफ्नो अप्रेसनलाई तुरुन्त सञ्चालन गरेको थियो । प्रहरीले सोही दिन रोहेणीपुलबाट बा ५१ प ८०७३ नम्बरको मोटरसाइकल बरामद गरेको थियो ।
सोही दिनकै साँझ देवदह नगरपालिका वडा नम्बर ६ का छविलाल मगरका छोरा मनोज पुन मगरले विभिन्न व्यक्तिलाई फोन गरी तिवारी हत्याको जिम्मा लिएका थिए ।
प्रहरीका अनुसार मनोजले व्यक्तिगत दुश्मनीका कारण मनोजको हत्या गरेका थिए ।
१२ जनाको अपराधिक समूहतिवारीको हत्यामा १२ जनाको संलग्नता रहेको प्रहरी अनुसन्धानले देखाउँछ । घटनाका मुख्य योजनाकार २९ वर्षीय मनोज नै हुन् । उनी सो घटनापछि फरार रहेका छन् ।
‘रुपन्देहीकै विकास भन्ने सोमबहादुर आले घटनाका योजनाकार थिए । बाराका श्याम गुरुङ घटनाका अर्का योजनाकार थिए । मनोजसहित यी दुई योजनाकार फरार छन्,’ डिएसपी पाण्डेले भने ।
त्यस्तै घटनामा राजु नाम गरिएका व्यक्तिलाई तिवारीमाथि गोली प्रहार गर्ने भूमिका दिइएको थियो । त्यस्तै देवदहका तुलबहादुर सिँजालीले चाहिँ हतियार राख्ने/दिने गरेर सहयोग गरेका थिए ।
मुख्य भूमिकामा रहेका यी पाँचजना फरार छन् । अहिले उनीहरू भारतमा लुकेर बसेको अनुमान प्रहरीले गरेको छ । यीबाहेक घटनामा संलग्न सातजनालाई प्रहरीले पक्राउ गरेको छ ।
को को हुन बाँकी सातजना ?देवदहकै ३१ वर्षीय वसन्तबहादुर चापागाईं घटनामा संलग्न अर्का अभियुक्त हुन् । उनले घटनाको दिनभर पुनको निर्देशनबमोजिम तिवारीको गतिविधिमा निगरानी गरेका थिए ।
तिलोत्तमा नगरपालिकाका बुद्धिसागर यादव पनि घटनाका अर्का अभियुक्त हुन् । उनले घटना गराउने उद्देश्यले निर्देशनअनुसार सागर थापाले ल्याएको बा ५१ प ८०७३ नम्बरको मोटरसाइकल लुकाई छिपाई आफ्नो घरमा राखिदिएका थिए । घटना हुँदाको दिन उनले सो मोटरसाइकल आफ्नो भाई राजेश यादवसँग पठाएका थिए ।
अर्का अभियुक्त हुन् राजेश यादव । तिलोत्तमा नगरपालिकामा घर भएका उनले दाजु बुद्धिसागर यादवले घरमा ल्याएर राखेको सो मोटरसाइकललाई रोहिणी पुलमा लगेर सागर थापाको जिम्मामा लगाएका थिए ।
तिलोत्तमाकै ३३ वर्षीय खेमानन्द भट्टराई अर्का अभियुक्त हुन् । उनले पुनको निर्देशनबमोजिम सोही दिन बिहान शूटरलाई आफ्नो लु २८ प २११९ नम्बरको मोटरसाइकलमा राखेर रोहिणी पुलसम्म लगेका थिए ।
घटनापश्चात् शूटर तथा सागर थापालाई सोही मोटरसाइकलमा रोहिणी पुलबाट मणिग्रामसम्म लगेका थिए । त्यसबेला सागर थापाको सिम उनले भाँचिदिएका थिए भने शूटरलाई पोखरातर्फ र सागरलाई पाल्पा हुँदै गुल्मीतर्फ पठाएका थिए ।
अर्का अभियुक्त देवदहका २३ वर्षीय सागर थापा हुन् । उनले राजेश यादवसँग मोटरसाइकल रिसिभ गरी शूटरलाई मोटरसाइकलको पछाडि बसाली देवदह खैरेनीतर्फ गई साइकल पसलबाट पौडेल मिष्ठान्न भण्डार अगाडि रहेका तिवारीलाई वाच गरेका थिए ।
त्यसपछि तिवारी मोटरसाइकलमा जाँदै गरेको अवस्थामा उनको पिछा गरी देवदह–८ स्थित कोलिया मार्गमा पुगेको बेलामा तिवारीले चलाएको मोटरसाइकलभन्दा आफूले चलाएको मोटरसाइकल केही अगाडि लगेका थिए ।
त्यहीबेला तिवारीलाई गोली हानी सेमराना हुँदै रोहिणी पुलमा पुगी मोटरसाइकलमा रोहिणी पुलमा छाडी खेमानन्द भट्टराईको लु २८ प २१ १९ नम्बरको मोटरसाइकलमा मणिग्रामतर्फ गई सो दिन उनी पाल्पातर्फ लागेका थिए ।
अर्का अभियुक्त हुन् परासीका २८ वर्षीय अगंद थारू । उनले हातहतियार ओसार्ने तथा फिरौती रकम पठाउने काम गरेका थिए । त्यस्तै देवदहका ऋषीश्वर कुमालले पनि हातहतियार संकलन तथा फिरौती रकम पठाउने काम गरेका थिए ।
साथै प्रहरीले सो घटनामा थप स्थानीय तथा बाहिरी मानिसको समेत संलग्नता भएको हुनसक्ने अनुमान गरेको छ । साथै प्रहरीले निज मगरलाई सहयोग नगर्न र उनको बारेमा केही जानकारी भएमा आफूलाई उपलब्ध गराउन पनि आग्रह गरेको छ ।
मगरले त्यसभन्दा अघि पनि तिवारीमाथि इँटाभट्टामा गोली प्रहार गरेका थिए । त्यसबेला बाँचेका तिवारीको उनले पुसमा हत्या गरेका हुन् । उनीहरूबीच लामो समयदेखि दुश्मनी रहँदै आएको स्थानीयहरू बताउँछन् ।
