काठमाडौं,१६ फागुन– ओस्कार अवार्ड कार्यक्रममा सर्वश्रेष्ठ विदेशी फिल्मको अवार्ड जितेको फिल्म ‘द सेल्सम्यान’का निर्देशक असगर फरहादीले ट्रम्पका कारण अवार्ड कार्यक्रममा सहभागी हुन पाएनन् ।
ट्रम्पले केही महिनाअघि सात मुस्लिम देशका नागरिकलाई अमेरिका आउन निषेध गरिएपछि ती इरानी निर्देशक फरहादी अमेरिकामा भएको ओस्कार अवार्डमा सहभागी हुन नपाएका हुन् ।

ट्रम्प नीतिको विरोध गर्दै निर्देशक फरहादीले ओस्कार अवार्डको लागि विशेष आमन्त्रण गरी भिसा दिएपनि अमेरिका नजाने घोषणा गरेका थिए ।

फरहादीको सट्टामा उनको प्रतिनिधिले उक्त अवार्ड लिएका थिए । साथै उनले फरहादीको सन्देश पनि सुनाएका थिए । सन्देशमा ट्रम्प नीतिको आलोचना गरिएको थियो ।  

सामान्यतया ओस्कार विजेताको मृत्यु भएको अवस्थामा बाहेक अवार्ड लिनका लागि विजेता स्वयम उपस्थित हुनुपर्ने नियम छ । तर ओस्कारले यसपाली उनकै लागि उक्त नियमको परिवर्तन गरेको थियो ।

फरहादीको सट्टामा इरानी–अमेरिकी अन्तरीक्ष यात्री अनौशेह अन्सारीले अवार्ड लिएका थिए । उनले निर्देशक फरहादीको उक्त निर्णय निकै मुश्किल भएको भन्दै त्यसको लागि हिम्मतको जरुरी रहेको बताए ।

फरहादीको ‘द सेल्सम्यान’ फिल्म ८९ औं ओस्कार अवार्डको लागि विदेशी भाषा फिल्मको नोमिनेशनमा परेको थियो । अन्तमा यसै फिल्मले सर्वश्रेष्ठ विदेशी फिल्मको अवार्ड हात पारेको छ ।

अमेरिकाको राष्ट्रपति डोनाल्ड ट्रम्पले शरणार्थीलाई अमेरिका प्रवेशमा १ सय २० दिन प्रतिबन्ध तथा इरान, इराक , लिबिया, सोमालिया, सूडान र यमनका नागरिकमाथि ९० दिनसम्म अमेरिका प्रवेशमा प्रतिबन्ध लगाएका थिए ।
निर्देशक फरहादीले भने ‘ ओस्कार अवार्डमा मेरा फिल्मकर्मी साथीहरुसँगै सहभागी हुन नपाएकोमा मलाई अत्यन्तै दुःख लाग्छ ।’

उनले भने ‘ मेरो देशका नागरिक लगायत अन्य ६ देशका नागरिक कानुनी ढंगबाट अमेरिका प्रवेश हुनपर्छ र यी राष्ट्रमाथि भिसा प्रतिबन्ध लगाउने ट्रम्प नीतिको म विरोध गर्न चाहन्छु ।’ एजेन्सी