काठमाडौं–  भक्तपुरको मध्यपुर थिमी–६ स्थित कमेरोटारमा सञ्चालित खाजाघरबाट लागूऔषधको विक्रि हुने गरेको पाइएको छ । 

महानगरीय प्रहरी परिसर भक्तपुरबाट खटिएको टोलीले बिक्री वितरणको लागि तयार पारिएको लागुऔषध (गाँजा) सहित एक युवतीलाई पक्राउ गरेको छ । 

पक्राउ पर्नेमा सिन्धुलीको घ्याङलेख – ३ तामाजोर घर भई कमेरोटारमा खाजाघर संचालन गर्दै आएकी २२  वर्षीया  शान्तिमाया वाइवा रहेको प्रहरीले जनाएको छ । 

 गाँजा विक्री वितरण हुने गरेको  भन्ने विशेष सूचनाको आधारमा शुक्रबार महानगरीय प्रहरी परिसर भक्तपुरबाट प्रहरी टोली खाजाघरमा छापा मार्न पुगेको थियो ।

प्रहरीले खाजाघरबाट पोल्याण्ड भनिने गाँजा – ३ पिस (३० ग्राम), गाँजा प्याकेट –८२ पोका (२ केजी ४६० ग्राम ) र गाँजा पोका पार्न राखिएको प्लाष्टिक – १ केजी ७०० ग्राम बरामद गरेको जनाएको छ । यसबारे थप अनुसन्धान भइरहेको महानगरीय प्रहरी परिसर भक्तपुरका सूचना अधिकारी प्रहरी नायव उपरीक्षक रमण पोखरेलले जानकारी दिए ।