धनगढी–नेपाली काँग्रेसका केन्द्रीय सदस्य एवं यूवा नेता गगन थापाले वर्तमान सरकार र प्रमुख प्रतिपक्षीको रुपमा आफ्नै दल नेपाली काँग्रेसकोे प्रभावकारिता खस्केको टिप्पणी गरेका छन् ।

सरकार र प्रतिपक्षको नेतृत्वमा परिपक्व र कल्पनाशिल नेतृत्व नभएकै कारण मुलुक विकासको बाटोमा जान नसकेको थापाको भनाइ छ ।

आज (विहीबर) नेपाल प्रेस युनियन कैलालीले धनगढीमा आयोजना गरेको पत्रकार सम्मेलनमा नेता थापाले भने–‘प्रधानमन्त्रीले गर्न चाहना गर्नु भएको छ । तर के गरेर चाहना पूरा हुन्छ ? मेसो पाउन सकिरहनु भएको छैन । भेउ नै पाउनु भएन । त्यो छटपटाहट उहाँमा देखिएको छ ।’

सरकारले अहिले बोल्ने भन्दा काम गर्ने बेला रहेको भन्दै थापाले ३/४ महिना मौन बस्न सुझाव दिए । 

‘नेकपाका नेता माधव नेपालले प्रधानमन्त्रीलाई तपाई धेरै नबोल्नुस् भन्नु भएको थियो । अनि मैले केहि महिना बोल्दै नबोल्नुस् भनेको थिए । केहि महिना सरकारले मौन व्रतको घोषणा गरिदिनुस् । एकैचोटी ३÷४ महिनापछि यो–यो काम गरे भनेर देखाउने हो । यसले सरकारलाई फाइदा गर्छ’, उनले थपे ।

नेता थापाले आफ्नै दल काँग्रेसको भूमिकामाथि समेत प्रश्न गरेका छन् । प्रधानमन्त्री अलिकति अलमलिँदा वा बरालिदा सिंगो सरकार कमजोर भए जस्तै काँग्रेसमा पनि त्यस्तै समस्या देखिएको उनको भनाइ छ । 

‘जसरी प्रधानमन्त्रीको लिडरसिपमा सिंगो सरकारको प्रभावकारिता रहन्छ त्यस्तै प्रतिपक्षको प्रभावकारिताको भूमिकाको सन्दर्भमा पनि यसको लिडरसिपसंग रहन्छ’ थापाले भने ।

आफ्नै पार्टी सभापति शेरबहादुर देउवालाई इंगित गर्दै उनले संसदीय दलको नेताले संसदमा कमजोरी प्रदर्शन गरिरहेको समेत आरोप लगाए । ‘आजको दिनमा हामीले कति पटक हाम्रो संसदीय दलको नेतालाई संसदमा उभिएर राष्ट्रिय महत्वको विषयमा बोलेको देखेका छां’ थापाले प्रश्न गरे ।   

मंसिर २८ गते हुने काँग्रेसको महासमिति बैठकको पूर्वसन्ध्यामा देश दौडाहामा रहेका नेता थापाले पार्टी नेतृत्वले अझै पहलकदमी लिन नसके अप्ठेरोमा परिने ठोकुवा गरे । काँग्रेसले संघीय संसददेखि प्रदेशको संसदसम्ममा प्रतिपक्षको भूमिका निर्वाह गर्न नसकेको बताउँदै उनले समयमा पार्टीभित्रका  गुनासोलाई दबाउनु भन्दा त्यसलाई व्यवस्थापन गरेर निर्खानुपर्नेमा जोड दिए ।

‘नेपाली काँग्रेसले तत्काल आफ्नो भूमिकालाई जुझारु बनाउन सकेन भने यसले सिर्जना गर्ने अप्ठ्याराहरु पार्टीको लागि मात्रै छैनन् यसलाई लार्ज पिक्चरमा हेर्नुपर्छ ’ थापाले भने ।