काठमाडौं–काठमाडौंमा शुक्रबारदेखि सोमबारसम्म चल्ने एसिया प्यासिफिक समिटमा सहभागि हुन विदेशी राष्ट्र प्रमुख तथा सरकार प्रमुखको लाइन लागेको छ । सम्मेलन क्रिश्चियन धर्म प्रचारक संस्था युनिभर्सल पिस फेडेरेसको आयोजनामा हुन लागेको हो । 

सम्मेलनमा छ राष्ट्र/ सरकारप्रमुख तथा उपप्रमुख, पाँच प्रथम महिला, १० पूर्वराष्ट्र प्रमुख, एक उपप्रधानमन्त्री, पाँच सभामुख तथा उपसभामुख गरी ४५ देशका एक हजार ५०० विदेशी विशेष अतिथिको सहभागिता हुने आयोजकले जनाएको छ । 

सम्मेलनमा भाग लिन तथा नेपालको औपचारिक भ्रमणका लागि विभिन्न मुलुकका राष्ट्र/सरकार प्रमुख र विशिष्ट पाहुना काठमाडौँ आउने क्रम जारी छ । 

सम्मेलनले नेपालको सफल शान्ति प्रक्रिया र नयाँ संविधान निर्माणपछिको रुपान्तरणका प्रक्रियाका बारेमा विश्वव्यापी सन्देश दिनेछ । ‘वर्तमान समयका गम्भीर चुनौतीमाथि सम्बोधनः अन्तरनिर्भरता, पारस्परिक समृद्धि र विश्वव्यापी मान्यता’ विषयको सम्मेलनका लागि विशिष्ट अतिथिको आगमन बुधबारदेखि शुरु भएको थियो । 

सम्मेलनमा सहभागि हुनैको लागि बिहिबार म्यान्माका स्टेट काउन्सिलर आङसाङ सुकी र कम्बोडियाका प्रधानमन्त्री हुन सेन काठमाडौँ आई सकेका छन् ।  त्यस्तै टुभालुका राष्ट्रपति लाकोबा ताइया इतालेनी पनि बिहिबार नै काठमाडौँ आएका छन् । 

 सम्मेलनमा सहभागी हुन शुक्रबार नाउरुका राष्ट्रपति बारोन वाका र समोआका राष्ट्रप्रमुख अफिओगा तुइमालियालिफानो भालेटोआ सुवालौभी द्वितीय आउँदै छन् । फिलिपिन्सका उपराष्ट्रपति लेनी रोब्रेदो बुधबार नै नेपाल आइपुगेका थिए ।  

क्रिश्चियन धर्म प्रचारक संस्था युनिभर्सल पिस फेडेरेसको यो कार्यक्रमलाई नेपाल सरकार तथा सङ्घीय संसद् नेपालको समेत सहयोग रहेको छ । 

सम्मेलनका लागि नेपाल सरकारले सुरक्षा प्रबन्ध गरेको छ । विशिष्ट पाहुनाको सुरक्षा र यातायातको व्यवस्थापन नेपाल सरकारले तथा सम्मेलनको अन्य व्यवस्थापन आयोजक समितिले गरेको समितिका सहसंयोजक एकनाथ ढकालले जानकारी दिए । 

सम्मेलन आयोजनाका लागि पूर्वप्रधानमन्त्री एवं नेपाल कम्युनिष्ट पार्टी (नेकपा) का वरिष्ठ नेता माधवकुमार नेपालको संयोजकत्वमा समिति गठन गरिएको छ । 

युनिभर्सल पिस फेडेरेसको सन् २००५ मा कोरियाका धार्मिक नेता सन म्युङ मुनले यो संस्था स्थापना गरेका थिए । 

सन् २००५ मै यो संस्था नेपाल आइपुगेको थियो । सोही संस्थाको नेपाल अध्यक्षमा अहिले एकनाथ ढकाल अध्यक्ष छन् । उनै ढकालले सांसद नभएपनि राजनीतिक शक्ति देखाएका छन् अर्थात सरकारी संयन्त्रको प्रयोग गरेर विदेशी राष्ट्र प्रमुख तथा सरकार प्रमुखको लाइन लगाइदिएका छन् ।

सम्मेलनमा नेपालको तर्फबाट प्रधानमन्त्री केपी शर्मा ओली सहभागि हुनेछन् । 
सम्मेलन आयोजक समितिका शिष्टाचार अधिकृत काशीनाथ खनालले विश्वका विद्यमान चुनौतीको सामना कसरी गर्न सकिन्छ भन्नेबारेमा बहस गरी निचोड निकाल्न सम्मेलन उपयोगी हुने बताए । 

नेपालको शान्ति सम्झौता र लोकतान्त्रिक आन्दोलनपछिको रुपान्तरण प्रक्रिया विश्वमै उदाहरणीय रहेका सन्दर्भमा नेपालमा सम्मेलन हुनाले त्यसको समेत सन्देश प्रवाह हुने उनको भनाई छ ।  नेपाल सरकारले सन् २०२० लाई पर्यटन वर्ष घोषणा गरेको अवस्थामा सम्मेलनमा ४५ मुलुकका एक हजार पाँच सय विशिष्ट पाहुनाको सहभागिताले नेपालले प्रत्यक्ष लाभ लिन सक्ने पनि खनालले प्रतिक्रिया दिए । 

सम्मेलनको उद्घाटन समारोहमा प्रधानमन्त्री केपी शर्मा ओलीसहित सहभागी मुलुकका सरकार तथा राष्ट्रप्रमुखबाट सम्बोधन हुनेछ भने सम्मेलनमा सात सत्रमा विषयगत छलफल हुनेछ ।