काठमाडौं, २२ फागुन– राष्ट्रिय प्रजातन्त्र पार्टीले स्थानीय तह अनुरुप पार्टी इकाई समायोजन निर्देशिका कार्यान्वयन गर्ने निर्णय गरेको छ ।
आज पार्टी कार्यालय धुम्बराहीमामा कमल थापाको अध्यक्षतामा बसेको पदाधिकारीहरुको पहिलो बैठकले स्थानीय तहको नयाँ संरचना अनुरुप पार्टी संरचना विस्तार गर्ने निर्णय गरेको हो । जसका लागि नंया संरचना अनुरुप गाउँपालिका वा नगरपालिका बनाउंदा पुरानो वडाहरु यथावत कायम रहेको अवस्थामा सो वडाको हाल विद्यमान वडासमितिलाई नै कायम गर्ने निर्णय गरिएको छ ।
त्यस्तै गाउँपालिका वा नगरपालिका बनाउंदा दुई वा दुई भन्दा बढि वडाहरु गाभिएको अवस्थामा पुरानो वडासमितिलाई टोल समितिमा परिणत गर्ने र गाभिएका वडा कार्यसमितिहरु मध्यबाट नंया संरचना अनुरुपको वडा समिति गठन गर्ने सहमति गरिएको छ ।
नयाँ संरचना अनुसार समितिहरु गठन गर्दा सहमतिको आधारमा गर्ने राप्रपाले निर्णय गरेको छ । समितिमा गठन वा समायोजन हुन नसके अर्को व्यवस्था नभएसम्म जिल्ला कार्यसमितिले तदर्थ समिति गठन निर्णय गरिएको छ ।
पार्टीको केन्द्रीय कार्य समितिले निर्णय गरे बमोजिमको स्थानीय तह निर्वाचन तयारी कार्ययोजना कार्यान्वयनमा लैजाने निर्णय बैठकले गरेको छ । जस अनुसार उमेदवार छनौट, प्रचार अभियान, वर्गिकरण, समिकरण र तालमेल, प्रशिक्षण, घोषणापत्र, उमेदवार सिफारिस लगायतका बिषयलाई कार्यतालिका बनाई कार्यान्वयन गर्ने निर्णय गरेको छ ।
बैठकले कार्य समितिको बैठकले निर्णय गरे अनुरुप चैत्र ७ देखि १२ गतेसम्म राष्ट्रिय एकता यात्रा कार्यक्रम संचालन गर्नका लागि पार्टीका चार शिर्ष नेताहरु अध्यक्ष कमल थापा, पूर्व प्रधानमन्त्री लोकेन्द्र बहादुर चन्द, पूर्व राष्ट्रिय अध्यक्षहरु पशुपति शम्शेर जबरा र डा.प्रकाशचन्द्र लोहनीको नेतृत्वमा चार मुख्य ठाउँहरु गोरखा, कंचनपुर, झापा र काठमाण्डौबाट एकैदिन एकैसाथ एकता यात्रा प्रारम्भ गर्ने निर्णय गरेको छ ।
