१२ असार २०८३, शुक्रबार
काठमाडौं — श्रीलंकाका प्रधानमन्त्री रनिल विक्रमसिंघेले मन्त्रीहरूको नियुक्तिका सम्बन्धमा राष्ट्रपति मैत्रीपाला सिरिसेनासँग ठाकठुक परेको स्वीकार गरेका छन् । तर यो विषयलाई सुल्झाइने विश्वास उनले लिएका छन् ।
खबरहरूका अनुसार, राष्ट्रपति सिरिसेनाले विक्रमसिंघेका केही उम्मेदवारको नाम खारिज गर्दै बिहीवार ३० सदस्यीय मन्त्रिपरिषद्लाई अन्तिम रूप दिए र सुरक्षा बल तथा प्रहरीमा आफैंले नियन्त्रण राखे ।
यसबाट सिरिसेना र विक्रमसिंघेबीच सत्ता संघर्ष जारी रहेको संकेत प्राप्त भएको छ ।
कोलम्बो गजेटका अनुसार, विक्रमसिंघेले शुक्रवार मिडियाको आलोचना गर्दै केही मानिसले किर्ते सूची जारी गर्दै त्यसमा उनको उम्मेदवार परेको अनि त्यसलाई सिरिसेनाले अस्वीकार गरेको लेखेको भने ।
मिडियाले श्रीलंका फ्रीडम पार्टीका सदस्य विजयमुनि जोयसाको नाम मन्त्री पदका लागि नामांकित सांसदको सूचीमा रहेको दाबी गरेको थियो ।
तर प्रधानमन्त्रीले जोर दिएर जोयसाको नाम सूचीमा नरहेको बताए । विक्रमसिंघेले मिडियाको एक तप्का मानिसलाई भ्रममा पार्ने प्रयास गरिरहेको र उनीहरूलाई कारवाही गरिने बताए ।
क्याबिनेट गठनका विषयमा सदनमा एक बयान जारी गर्ने पनि विक्रमसिंघेले बताए ।
एजेन्सी
