लोकान्तर संवाददाता
काठमाडौं, २३ फागुन –एनआईसी एशिया बैंक लिमिटेडको सहायक कम्पनी एनआईसी एसिया क्यापिटल लिमिटेडको औपचारिक उद्घाटन गरिएको छ । आइतवार नेपाल धितोपत्र बोर्डका अध्यक्ष डा. रेवत बहादुर कार्की तथा एनआईसी एशिया बैंकका अध्यक्ष जगदीश प्रसाद अग्रवालले संयुक्त रुपमा एनआईसी एसिया क्यापिटल लिमिटेडको उद्घाटन गरेका हुन् ।
एनआईसी एशिया बैंकको पूर्ण स्वामित्वमा १० करोड रुपैयाँ चुक्ता पूँजी रहेको एनआईसी एशिया क्यापिटल नेपाल धितोपत्र बोर्डबाट मर्चेन्ट बैंकिङ्ग कार्य गर्न इजाजत प्राप्त संस्था हो ।
क्यापिटलले काठमाडौंस्थित बबरमहल कार्यालयबाट पूँजीबजारसँग सम्बन्धित धितोपत्र निष्कासन तथा विक्री प्रबन्धक, धितोपत्र प्रत्याभूति, शेयर रजिष्ट्रार तथा लगानी व्यवस्थापन, म्युचुअल फण्ड व्यवस्थापन लगायतका काम गर्दै आएको छ ।
क्यापिटलले प्रचालित ऐन कानून तथा नियमनकारी व्यावस्था बमोजिम मर्चेन्ट बैंकिङ्ग कम्पनीले गर्न सक्ने सम्पुर्ण सेवा प्रदान गर्ने छ ।
उद्घाटन कार्यक्रममा नेपाल धितोपत्र बोर्ड, नेपाल स्टक एक्सचेन्ज लिमिटेड, सिडिएस एण्ड क्लियरिङ्ग लिमिटेड तथा एन आई सी एशिया बैकका पदाधिकारीको पनि उपस्थिति रहेको थियो ।
