२२ जेठ २०८३, शुक्रबार
काठमाडौं– नेपाल बार एशोसिएशनले अधिवक्ता रामकुमार आचार्य पक्राउको विषयमा आफ्नो ध्यानाकर्षण भएको जनाएको छ ।
उच्च अदालत बार एशोसिएशनका पूर्व सदस्य समेत रहेका आचार्यलाई कैदी भगाएको आरोपमा प्रहरीले पक्राउ गरेको थियो । बुधबार चोरी आरोपमा समातिएका सिन्धुपाल्चोकका लालकाजी तामाङ जिल्ला अदालत काठमाडौं परिसरबाटै फरार भएका थिए ।
बारका महासचिव खम्मबहादुर खातीले जारी गरेको प्रेस विज्ञप्तिमा विधिको शासन, कानून राज्य र मानव अधिकारको विषयमा वकालत गर्ने कानून व्यवसायीलाई कैदी भगाएको झुठो आरोप लगाउँदा कानून व्यवसायीको इज्जत र प्रतिष्ठामा आँच आउने कार्य भएको उल्लेख गर्दै त्यस कार्यको निन्दा गरेको छ ।
सो घटनाले सम्पूर्ण कानून व्यवसायी मर्माहत भएको हुँदा आगामी दिनमा अदालत, कर्मचारी प्रशासन र विधिको शासन मान्ने सबैले जिम्मेवार हुन बारले ध्यानाकर्षण गराएको छ ।
