धनगढी– कैलालीको गोदावरी नगरपालिका–८ हरैयास्थित विवादित जग्गामा करोडौं लगानी गरेका पोखराका व्यवसायी विमल बसेलको लगानी अझै सुरक्षित हुन सकेको छैन ।

व्यवसायी बस्यालसहित ५ जनाले गत वर्ष शौभाग्य रियल स्टेट एण्ड हाउजिङ्ग कम्पनीको नाममा २३ विघा जमिन ५२ करोडमा खरिद गरेका थिए । दाङका रणबहादुर शाहको नाममा रहेको सो जग्गामा सशस्त्र द्वन्द्वताका तत्कालीन नेकपा माओवादीले कव्जा गरी सुकुमबासीलाई बसाएको थियो । 

जग्गा खरिदपछि व्यवसायी बसेलले त्यहाँ बसेका सुकुमबासीहरु मध्ये कसैलाई जग्गा त कसैलाई पैसा दिएर व्यवस्थापन गर्दै आएका छन् । तर नयाँ–नयाँ सुकुमबासी थपिने क्रम जारी रहनु र विभिन्न राजनीतिक दलका नेता तथा कार्यकर्ताहरुले आफूलाई पैसा नदिए सुकुमबासीबाट कब्जा गराइदिने धम्की दिदै आएपछि उनी आक्रान्त बनेका छन् ।

‘म यहाँ मात्रै होइन, पहिलैदेखि सामाजिक कार्यमा पनि संलग्न छु । जग्गा खरिद गरिसकेपछि सुकुमबासीहरुलाई डण्डा देखाएर धपाउने सल्लाह पनि मलाई नआएको होइन । तर म कहिल्यै त्यस्तो सोचिन । बरु गरीबहरुलाई धपाएर दुःख दिनु भन्दा उनीहरुलाई व्यवस्थापन गर्ने कार्यमा लागे । तर आजभोलि विभिन्न पक्षले पैसा मागेर बार्गेनिङ गर्न थालेपछि असहज भएको छ’, धनगढीमा पत्रकारहरुसँग कुरा गर्दै व्यवसायी बसेल भने ।

व्यवसायी बसेलले हरैयामा बसेका ६२ जना सुकुमवासी परिवारलाई धनगढी उपमहानगरपालिका–१७ धुरझन्नामा १/१ कट्टाको दरले जग्गा खरिद गरी बसाएका छन् । जसमा मात्रै ३ करोड लगानी गरेको उनको भनाइ छ । त्यस्तै, उनले ३७ परिवारलाई नगद २ लाख ८ हजारका दरले रुपियाँ दिई व्यवस्थापन गरेका छन् । भने जग्गा अझै बसिरहेका २८ परिवारलाई उनीहरुकै इच्छा अनुसार व्यवस्थापन गर्ने उनको भनाइ छ । तर थप सुकुमबासी आउने कुराले आफूलाई अप्ठेरो भएको व्यवसायी बसेल बताए ।

व्यवसायी बसेलले जग्गा खरिददेखि सुकुमबासी व्यवस्थापनसम्म हालसम्म आफुले ५६ करोड लगानी गरिसकेको जनाएका छन् ।

जानी–जानी यस्तो दलदलमा कसरी फस्नु भयो ? भन्ने जिज्ञासामा उनी भन्छन्–‘रणबहादुर शाह र म बीच चितवनको सेती चुरोट करखानाको जग्गा किनबेचको सहमति भएको थियो । तर त्यहाँको जग्गा नदिएर मलाई यहाँको जग्गा दिलाइयो । यहाँको जग्गा देखाएपछि उताको लगानी यता झोसियो । तर हाल धमिलो पानीमा माछा मार्ने काम भयो ।’ 

राज्यकै कानूनको अधिनमा रही जग्गा खरिद गरेको र औद्योगिक विकासको लागि नै ठूलो लगानी गर्ने योजनामा रहेकोे बताउँदै उनले आफ्नो लगानीको सुरक्षा राज्य र समाजले गर्नुपर्ने माग राखेका छन् । 

हरैयाको सो जग्गामा तत्कालीन माओवादीले बसाएका सुकुमवासीहरुले आफुहरुलाई उचित व्यवस्थापन नगरेसम्म जग्गा नछोड्ने अडान लिदै आएका थिए । पछिल्लो समय सो हरैया सुकुमवासी वस्ती राजनीतिक दलहरुको राजनीति गर्ने खेल मैदानमा परिणत भएको थियो । जुन जग्गा प्रकरणमा नेकपाका नेता लेखराज भट्टदेखि नेत्रविक्रम चन्द (विप्लव) नेतृत्वको नेकपासम्मको नाम जोडिएको छ ।

हरैयामा ५ तारे होेटल स्थापना गर्ने

व्यवसायी बसेलले हरैयाको सो जग्गामा १ अर्बको लगानीमा केही उद्योग र होटेल स्थापना गर्ने बताएका छन् । एउटा मिनरल वाटर कम्पनी, ५ तारे होटल र थारु कल्चर झल्किने घरहरु निर्मााण गर्ने योजना रहेको बताउँदै उनले १ अर्ब लगानी गर्ने जनाएका छन् ।

व्यवसायी बसेल गण्डकी मेडिकल कलेजको संस्थापक पनि हुन् ।