काठमाडौं –आफ्ना नेताको नाममा रहेका अस्पताललाई केन्द्र सरकार मातहत ल्याउनुपर्ने माग गर्दै प्रमुख प्रतिपक्षी दल नेपाली कांग्रेसले राष्ट्रियसभा बैठक अवरुद्ध पारेको छ । 

सोमवार बसेको बैठकको शुरूमै कांग्रेस सांसदहरू उभिएर गिरिजाप्रसाद कोइराला र सुशील कोइरालाको नाममा रहेका अस्पताल संघ मातहत ल्याउने निर्णय नगर्दासम्म बैठक चल्न नदिने बताएका हुन् ।

अध्यक्षसँग समय लिएर कांग्रेस सांसद बद्री पाण्डेले सरकार झनझन असहिष्णु र स्वेच्छाचारी बनेको आरोप लगाए । ‘सरकारले राजा महेन्द्र र श्री ३ महाराजको जस्तो कांग्रेस नेताहरूका नाममा रहेका अस्पताल खारेजीको तगारी गरेको छ, नेकपालाई ज्ञात रहोस् व्यवस्था फेरिएको होइन सरकार मात्र फेरिएको हो,’ पाण्डेले भने । 

उनले प्रतिनिधिसभाका चिकित्सा शिक्षा विधेयक पारित गर्ने क्रममा सरकारले गरेको बलजफ्ती र संवैधानिक परिषद्को बैठकमा विपक्षी दलका नेताको अनुपस्थितिमा गरिएका निर्णयबारे आफूहरू निकै गम्भीर भएको बताए ।

कांग्रेसको विरोधपछि राष्ट्रिय सभाको बैठक १५ मिनेटका लागि स्थगित भएको छ । बैठकमा प्रतिनिधि सभाबाट पारित चिकित्सा शिक्षा विधेयक टेबुल गर्ने कार्यसूची छ ।

यसअघि माघ २ र ७ गतेको बैठक पनि कांग्रेसले अवरुद्ध गरेको थियो ।