काठमाडौं– प्रधानमन्त्री केपी शर्मा ओलीले पश्चिम सेती जलविद्युत् आयोजना यसै सरकारको पालामा निर्माण हुने बताउनुभएको छ । नेपाल  विद्युत् प्राधिकरण स्याउले  १३२/३३/१२१ केभी सबस्टेशन उद्घाटन गर्न डडेल्धुरा अमरगढी नगरपालिका–१ दूधकाँडेमा पुग्नुभएका प्रधानमन्त्री ओलीले सुदूरपश्चिम प्रदेशमा विधुतीकरण, सडक यातायात, शिक्षा बेरोजगारजस्ता समस्या समाधान गर्ने बताउनुभयो । 

डडेल्धुरासहित सुदूरपश्चिमका विभिन्न जिल्ला भारतसँग जोडिएका क्षेत्रमा पक्की पुल हुने ठाउँमा पक्की पुल बनाउने, सम्भावना भएका ठाउँमा झोलुङ्गे पुल र पक्की तथा झोलुङ्गे पुलको सम्भावना नभएका स्थानमा तुइन विस्थापित गर्दै केबुलकार सञ्चालन गरिने प्रधानमन्त्री ओलीले बताउनुभयो ।

सो अवसरमा सुदूरपश्चिम प्रदेशका मुख्यमन्त्री त्रिलोचन भट्ट, ऊर्जा जलस्रोत तथा सिँचाइमन्त्री वर्षमान पुन, भौतिक पूर्वाधार तथा निर्माणमन्त्री रघुवीर महासेठ, सुदूरपश्चिम प्रदेशका भौतिक पूर्वाधर विकासमन्त्री पठानसिंह बोहरा र नेपाल विद्युत् प्राधिकरण कार्यकारी निर्देशक कुलमान घिसिङ लगायतको उपस्थिति थियो ।

योग्यता पुर्‍याउन शिक्षकलाई पाँच वर्षको म्याद
विद्यालयमा अध्यापन गरिरहेका तर योग्यता नपुगेका शिक्षकहरूले पाँच वर्षभित्र योग्यता पुर्याउनुपर्ने भएको छ । सरकारले तयार गरेको राष्ट्रिय शिक्षा ऐनको मस्यौदामा आधारभूत तहमा अध्यापन गराउन कम्तीमा स्नातक र माध्यमिक तहमा कम्तीमा स्नातकोत्तर तह हुनुपर्ने व्यवस्था गरेपछि योग्यता नपुगेका शिक्षकले अनिवार्य रूपमा स्नातक वा स्नातकोत्तर तह पूरा गर्नुपर्ने भएको छ । 

प्रस्तावमा बालविकास केन्द्र (ईसीडी) र कक्षा १ देखि ३ सम्म अध्यापन गराउन भने कक्षा १२ वा प्रविणता प्रमाणपत्र तह अध्ययन पूरा गरे पुग्ने भएको छ । हाल सार्वजनिक भएको मस्यौदा प्रति नेपाल शिक्षक महासंघले आपत्ति जनाएको छ । ‘मस्यौदामा यस्तो विषय उल्लेख भएको सुनेको छु । यस्तो व्यवस्था गर्न लागेको भए हामी मान्दैनौँ, महासंघका अध्यक्ष बाबुराम थापाले भने । पाँच वर्षभित्र योग्यता र्पुयाउने विषय हटाउनुपर्ने उनले बताए । 

‘स्नातक तह पूरा गर्न चार वर्ष लाग्ने अवस्थामा कसरी पाँच वर्षभित्र स्नातकोत्तर तह पूरा गर्न सकिन्छ’, उनले भने । मस्यौदामा पाच वर्ष उल्लेख भए त्यसलाई सच्याएर सात वर्ष कायम गर्नुपर्ने उनको भनाइ छ ।, नेपाल समाचारपत्रमा खबर छ । 

तनहुँ सेतीले तोड्यो सिएमसीसँगको ठेक्का
नेपाल विद्युत् प्राधिकरणको सहायक कम्पनी तनहुँ हाइड्रो पावर लिमिटेडले इटालीको ठेकेदार सिएमसीसँगको ठेक्का सम्झौता तोडेको छ ।     तोकिएको समयमा ठेकेदार काम गर्न नआएपछि आयोजनाले ठेक्का सम्झौता तोडेको हो । 

कूल १४० मेगावाट क्षमताको सो आयोजनाका लागि कम्पनीले गत असोज १५ गते  निर्माण व्यवसायी छनोट गरेको थियो । आयोजनाको नदी फर्काउने, बाँध लगायतका संरचना निर्माणका लागि सबैभन्दा कम बोलकबोल गर्ने इटालियन कम्पनी सिएमसी छनोट भएको थियो । 

आयोजनाले ठेकेदार कम्पनीसँग रु २० अर्ब ६४ करोड ५२ लाखमा खरीद सम्झौता गरेको थियो । सिएमसीसँगको ठेक्का सम्झौता तोडिएपछि नयाँ प्रक्रियाबाट ठेकेदार छनोटको काम अगाडि बढ्ने प्रबन्ध सञ्चालक थिकेले जानकारी दिए । लगानीकर्ता एशियाली विकास बैंक र युरोपियन इन्भेस्ट बैंक लगायतका निकायसँग आवश्यक छलफल र परामर्शपछि उपयुक्त निर्णय लिइने उहाँको भनाइ छ । सिएमसीले रु एक अर्ब ९७ करोड धरौटी राखेको थियो । 

पाठकमाथि आयोगले नै छानबिन गर्ने
अख्तियार दुरुपयोग अनुसन्धान आयोगका पूर्व आयुक्त राजनारायण पाठकको घुस प्रकरणमा छानबिन गर्न अख्तियारले तीन सदस्यीय छानबिन समिति बनाएको छ । अख्तियारका प्रवक्ता रामेश्वर दंगालका अनुसार समितिले काम सुरु गरिसकेको छ । पाठकमाथि ७८ लाख रुपैयाँ घुस लिएको आरोप लागेपछि उनले यही फागुन ३ गते राष्ट्रपति विद्यादेवी भण्डारी समक्ष राजीनामा दिएका थिए । 

कारवाही प्रक्रियाबारे अख्तियार र महान्यायाधिवक्ताको कार्यालयबीच परामर्श भइरहेको पनि अख्तियार श्रोतले बताएको छ । भक्तपुरस्थित नेपाल इन्जिनिरिङ कलेजको स्वामित्व विवाद विषयमा विवादित एक समूहबाट पाठकले ७८ लाख रुपैयाँ घुस लिएका थिए ।

१२० महिलाको हत्या परिवारबाटै
महिला तथा बालबालिकाविरुद्ध मानव अधिकार उल्लंघन र दुर्व्यवहारका घटना धेरै हुने गरेको पाइएको छ । गत वर्ष देशभरि १२० महिलाको हत्या परिवारबाटै भएको तथ्य अनौपचारिक क्षेत्र सेवा केन्द्र (इन्सेक)ले सार्वजनिक गरेको मानव अधिकार वर्ष पुस्तकमा उल्लेख छ ।

गत वर्ष मानव अधिकार उल्लंघनसम्बन्धी घटनामा पाँच हजार ११० जना पीडित भएका छन् । ती घटनामा पीडित महिला र बालबालिकाको संख्या धेरै रहेको पनि पुस्तकले औंल्याएको छ । इन्सेकको वर्ष पुस्तकमा महिला अधिकार उल्लंघनसम्बन्धी दुई हजार ८२४ र बाल अधिकारसम्बन्धी एक हजार २४८ घटना भएको उल्लेख छ ।, अन्नपूर्ण पोस्टमा खबर छ ।

अन्सारीको कागजात अध्ययन गरिने
संघीय संसद्को संसदीय सुनुवाइ समितिले मुस्लिम आयोगका प्रस्तावित अध्यक्ष समिम अन्सारीको कागजात अध्ययन गर्ने निर्णय गरेको छ । समितिको सिंहदरबारमा बसेको बैठकले अन्सारीमाथि परेको उजुरीकर्तासँगको छलफलपश्चात् नागरिकता, शैक्षिक प्रमाणपत्रको कागजात अध्ययन गर्ने भएको समितिका सभापति लक्ष्मणलाल कर्णले जानकारी दिए ।

सभापति कर्णका अनुसार नागरिकता, शैक्षिक प्रमाणपत्र र राजनीतिक दलको सदस्य रहेको उजुरी प्रस्तावित अध्यक्ष अन्सारीमाथि परेको छ । समितिले जिल्ला प्रशासन कार्यालय काठमाडौँमा प्रस्तावित अध्यक्ष अन्सारीको नागरिकताको सम्बन्धको परिवारको लगतसम्बन्धी सबै जानकारी माग गर्ने निर्णय गरेको छ । 

बैठकमा राष्ट्रिय प्राकृतिक तथा वित्त आयोगका प्रस्तावित अध्यक्ष डा बालानन्द शर्मा र राष्ट्रिय समावेशी आयोगका प्रस्तावित अध्यक्ष डा शान्ताराज सुवेदीको सुनुवाइ शुरु भएको छ । समितिका सदस्यले दुवै प्रस्तावित अध्यक्षसँग आयोग सञ्चालनका सम्बन्धमा कार्ययोजना माग गरेका थिए । 

जवाफमा प्रस्तावित अध्यक्ष पौडेलले मुलुक सङ्घीयतमा गइसकेकाले सङ्घ, प्रदेश र स्थानीय तहको बीचको वित्त र राजश्व बाँडफाँटलाई ध्यान दिने बताए । यस्तै डा सुवेदीले आफू लामो समय निजामती सेवामा काम गरेको हुनाले समावेशीबारे राम्रो जानकार भएकाले व्यावसायिकता र इमान्दारिताका साथ काम गर्ने बताए । 

आईपीएलको खेल तालिका सार्वजनिक
इण्डियन प्रिमियर लिग (आईपीएल) क्रिकेटको खेलतालिका सार्वजनिक भएको छ । मंगलबार सार्वजनिक तालिका अनुसार उद्घाटन खेलमा चेन्नई सुपर किंग्स र रोयल च्यालेन्जर्स बैंगलोरबीच प्रतिस्पर्धा हुने भएको छ । 

भारतीय क्रिकेट बोर्डले सार्वजनिक गरेको नयाँ सिजनको खेल तालिका अनुसार उद्घाटन खेल मार्च २३ मा साविकको विजेता चेन्नई र बैंगलोरबीच प्रतिस्पर्धा हुने भएको हो । भारतीय क्रिकेट बोर्डले १७ खेलको खेल तालिका सार्वजनिक गरेको हो । 

नेपाली राष्ट्रिय टोलीका लेग स्पिनर सन्दीप लामिछाने सम्मिलित दिल्ली क्यापिटल्सले २४ मार्चमा पहिलो खेल खेल्नेछ । पहिलो खेलमा दिल्लीले मुम्बई ईण्डियन्ससंग प्रतिस्पर्धा गर्नेछ ।