काठमाडौं– नयाँ शक्ति पार्टीका संयोज एवं पूर्वप्रधानमन्त्री डा. बाबुराम भट्टराईले पहिलो पटक दौरासुरूवाल लगाएका छन् । यसअघि प्रधानमन्त्री हुँदासमेत दौरासुरूवाल नलगाएका उनले कर्णाली पुगेर दौरासुरूवाल लगाएका हुन् । 

सधै कालो टोपी, कोट, पाइन्टमा देखिने डा. भट्टराई बिहीबार दौरासुरूवालसँगै नेपाली टोपीमा देखिए । उनले बिहीबार बिहान आफूले लगाएको पोशाकसहिता फोटा ट्वीट गरेका थिए । 

विभिन्न मेला पर्वअनुसार जाति विशेषका पोशाक लगाउने गरे पनि हालसम्म उनले दौरासुरुवाल भने नलगाएको बताएका थिए । भट्टराईले ‘देश अनुसारको भेष’ भन्दै दौरासुरुवाल र ढाका टोपीमा सजिएको फोटो ट्विट गरेका हेन् । उनले भनेका छन्– ‘देश अनुसारको भेष ! जीवनमा पहिलो पटक दौरासुरूवाल लगाएर खसबाहुल्य कर्णाली प्रदेश प्रवेश गरियाे !’

नयाँ शक्तिका संयोजक भट्टराईले यसअघि दौरासुरुवाल कुनै जातविशेषको पोशाक भएको भन्दै राष्ट्रिय पोशाक बनाउन नहुने बताउँदै आएका थिए । भट्टराई प्रधानमन्त्री हुँदा नै दौरासुरुवाललाई राष्ट्रिय पोसाकबाट हटाइएको थियो ।  

त्यसअघि प्रधानमन्त्री तथा मन्त्रीहरूले दौरासुरुवाल लगाउने प्रचलन थियो । तत्कालीन माओवादीका नेतारुले पनि दौरासुरुवाल लगाउने गरेका छैनन् । अहिले पार्टी प्रशिक्षणका क्रममा भट्टराई कर्णाली प्रदेशमा पुगेका हुन् । 
भट्टराई, प्रचण्डलगायतका नेताहरूले युद्धका क्रममा दशैँ र तिहारको टिका पनि बहिस्कार गरेका थिए ।