काठमाडौं – हेलिकप्टर दुर्घटनामा परी पर्यटनमन्त्री रवीन्द्र अधिकारीसहित ७ जनाको मृत्यु भएको छ ।

ताप्लेजुङस्थित प्रसिद्ध पाथिभरा मन्दिरमा दर्शन गरेर फर्किने क्रममा एयर डाइनेस्टीको हेलिकप्टर फुङलिङ नगरपालिका १० सिस्ने भीरमा ठोक्किएर दुर्घटनाग्रस्त बनेको प्रत्यक्षदर्शीले बताएका छन् ।

हेलिकप्टर पूरै जलेको छ भने ७ जनाको शव निकालिएको प्रत्यक्षदर्शी जगत कार्कीले लोकान्तरलाई जानकारी दिएका छन् ।

घटनास्थलमै रहेका प्रहरी हवल्दार वेदकुमार अर्यालले पनि घटनाको विवरण लोकान्तरलाई सुनाए ।

हवल्दार अर्यालको भनाइ जस्ताको तस्तै :

मेरो नाम वेदकुमार अर्याल हो । म नेपाल प्रहरीको हवल्दार हुँ । अहिले हेलिकप्टर दुर्घटनास्थलमा छु ।

म डेढ घण्टाअगाडि आएको हुँ । यहीँको स्थानीय चौकीमा कार्यरत छु । यहाँ आइपुग्न करीब दुईघण्टा लाग्यो । म सहित तीनजना साथीहरू यहाँ आएका छौं । हामी आउँदा दुर्घनाग्रस्त हेलिकप्टरमा आगो लागिरहेको थियो ।

स्थानीयका अनुसार मन्त्री रवीन्द्र अधिकारी चढेको हेलिकप्टर पाथिभरा मन्दिर क्षेत्रबाट उड्नुअघि नै बादल लागेको थियो ।

होलिकप्टर ल्याण्ड गर्दा घाम लागेको थियो । तर दर्शन गरेर फर्केपछि होलिकप्टर चढ्नुअघि बादल लागेको थियो । पाथिभरा मन्दिरबाट होलिकप्टर ओरालो लाग्यो  ।

शायद पाइलटले उचाइ लिनुपर्नेमा ओरालोतिर मात्र लाग्न थालेको स्थानीयले बताए । जतिजति ओरालो लाग्यो त्यति तल बाक्लो कुहिरो थियो ।

उडेको १५ मिनेटपछि नै सिस्ने भीरमा ठूलो आवाज आएको स्थानीयले मलाई बताए । घटनाको प्रकृति हेर्दा हेलिकप्टर भीरमा ठोक्किएको देखिन्छ ।

शायद बाक्लो कुहिरोका कारणले पाइलटले भीर देख्न सकेनन् । भीरमा ठोक्किएको ठूलो आजाव आएपछि शुरूमा स्थानीय बासिन्दा के भयो भनेर आत्तिएछन् ।

त्यही क्षेत्रमा होलिकप्टर देखिकाले केहीबेर अघि शायद दुर्घटना भयो भनेर अनुमान लगाएछन् । त्यही सूचना हामीसमक्ष आइपुग्यो । 

त्यही सूचनाका आधारमा हामी यहाँ आएका हौं । सात जनाको शव क्षतविक्षत् अवस्थामा देखिन्छन् ।

कुनै पनि शव चिन्न सकिने अवस्थामा छैन । हेलिकप्टर पूर्ण रूपमा जलेको छ ।

यहाँ अहिले स्थानीयको ठूलो भीड छ । हामी तीनजना प्रहरी मात्र छौं ।

यहाँ मोबाइल त टिप्छ तर नेट चल्दैन । त्यसैले हामी फोटोहरू पठाउन सक्ने अवस्थामा छैनौं ।