पोखरा- आन्तरिक तथा बाह्य पर्यटन प्रवर्द्धन गरी प्रदेशलाई आर्थिक रुपमा समृद्ध बनाउन गण्डकी प्रदेश सरकारले घोषणा गरेको होमस्टे (घरबास) कार्यक्रम अगाडी बढेको छ ।

प्रदेश सरकारको उद्योग पर्यटन तथा वातावरण मन्त्रालयले आन्तरिक तथा बाह्य पर्यटन प्रवर्द्धनका लागि पहिलो चरणमा प्रदेशमा १ सय ९० सामुदायिक होमस्टे सञ्चालनको प्रक्रिया अगाडि बढाएको छ ।

उद्योग पर्यटन तथा वातावरण मन्त्रालयले शुक्रवार एक कार्यक्रम आयोजना गरी होमस्टे सञ्चालनका लागि सम्झौतापत्र हस्तान्तरण गरेको छ । आन्तरिक पर्यटन वर्ष २०१९ तथा होमस्टे प्रवर्द्धन कार्यक्रममा मुख्यमन्त्री पृथ्वीसुब्बा गुरुङ, उद्योग पर्यटन वन तथा वातावरण मन्त्री विकास लम्साल, सभामुख नेत्रनाथ अधिकारी र होमस्टे सञ्चालकले सम्झौता पत्र हस्तान्तरण गरेका हुन् ।

होमस्टेलाई आवश्यक पूर्वाधार निर्माणका लागि सरकारले १० लाख रुपैयाँ सहयोग गर्नेछ । प्रक्रियामा रहेका होमस्टेहरुले मात्र सरकारबाट आर्थिक सहयोग प्राप्त गर्ने छन् ।

गण्डकी प्रदेशका मुख्यमन्त्री पृथ्वीसुब्बा गुरुङले प्रदेशका ग्रामीण क्षेत्रका जनताको आर्थिक समृद्धिका लागि होमस्टे कार्यक्रमले सहयोग पुग्ने बताए । उनले गण्डकी प्रदेश पर्यटकीय दृष्टिले अब्बल रहेको बताउदै आन्तरिक तथा बाह्य पर्यटन प्रवर्द्धनबाट गरिबी न्युनीकरण गर्न सकिने बताए । ‘प्रदेशमा रहेको गरिबीको सूचांकलाई ५ वर्षभित्र देखिने गरी तल झार्ने गरी योजना बताएका छौ', उनले भने, 'सरकारले प्रदेशमा ५ वर्षभित्र १४ प्रतिशत रहेको गरिबीलाई ७ प्रतिशतमा झार्ने छ । त्यसैगरी १२ वर्षभित्र प्रदेशको गरिबी २ प्रतिशतमा झार्ने योजना सहित काम अगाडी बढेको छ ।’ मुख्यमन्त्री गुरुङले प्रदेशको समृद्ध पर्यटन, जलस्रोत र कृषीबाटै सम्भव रहेको बताए ।

सभामुख नेत्रनाथ अधिकारीले भाषणले भन्दा पनि काम गरेर समृद्धि हासिल गर्न सकिने बताए । ‘प्रदेशका विभिन्न स्थानका पर्यटकीय संभावना भएका क्षेत्रहरुको पहिचान गरी आन्तरिक तथा बाह्य पर्यटन प्रवर्द्धन गर्नुपर्छ’, उनले भने, ‘पर्यटनको विकासबाटै प्रदेशको विकास र समृद्धि सम्भव छ ।’

सभामुख अधिकारीले नेपालको अवस्था सुनको थाल हातमा लिएर भीख माग्न बसेको जस्तो भएको भन्दै अब, विकास र समृद्धिमा दृढ भएर लाग्नुपर्ने बताए ।

प्रदेश सरकारले नीति तथा कार्यक्रममार्फत आर्थिक वर्ष ०७५/०७६ मा प्रदेशका विभिन्न ठाउँहरुमा ३ सय सामुदायिक होमस्टे बनाउने लक्ष्य लिएको छ ।

पहिलो चरणमा पूर्वाधार निर्माणका लागि अनुदान रकमको ४० प्रतिशत होमस्टेको खातामा रकम जम्मा गरीसकिएको मन्त्रालयले जनाएको छ । मन्त्रालयका सचिव बाबुराम भण्डारीले प्रदेश सरकारले हामेस्टे सञ्चालन कार्यविधि, होमस्टे पूर्वाधार व्यवस्थापन गर्न ३० करोड बजेट विनियोजन गरेको बताए। उनले होमस्टे सञ्चालकलाई १ हप्ते आधाभूत तालिम सञ्चालन गरिएको जानकारी दिए ।

प्रदेशका ११ जिल्लामा सञ्चालन हुने १ सय १० वटा होमस्टेमध्ये म्याग्दीमा ४, स्याङजामा ४२, तनहुँमा ३३, पर्वत ४२, गोर्खा ९, मुस्ताङ ३, लमजुङ १४, नवलपुर ६, र मनाङमा २ होमस्टेसँग पूँजीगत अनुदानका लागि सम्झौता गरिएको छ । विसं. २०५४ सालमा नेपालमै पहिलो पटक स्याङ्गजाको सिरुबारीमा होमस्टेको शुरुवात भएको थियो ।