काठमाडौं–कर्मचारी समायोजनमा तीन महिना खटिएका संघीय मामिला तथा सामान्य प्रशासन मन्त्रालयका सहसचिव केदार पनेरु बिहीबार फूर्तिसाथ भन्दै थिए, ‘कर्मचारी समायोजन सिध्याउन लागें ।’ संघ, प्रदेश र स्थानीय तहमा बिहीबारसम्म समायोजन भएका कर्मचारीको तथ्यांक भने समायोजन महाशाखा प्रमुख पनेरुले भनेजस्तो उत्साहजनक छैन ।

तीन तहमा समायोजन भएका ५३ हजार ६१२ कर्मचारीमध्ये अधिकांश अर्थात् ३४ हजार ७६३ कर्मचारी संघमै रहेको समाचार कान्तिपुर दैनिकमा छ । समायोजन फारम भर्न दिइएको म्यादभित्र ७७ हजार ३४ जनाले फाराम भरेका थिए । जसमा सरकारी सेवाका ७५ हजार ३६७ र अन्य सेवाका एक जार ६६७ जना थिए ।

राष्ट्रिय किताबखानामा भने कर्मचारी संख्या ८९ हजार छ । निजामतीबाहेक करिब २७ हजार स्वास्थ्य सेवाका कर्मचारी छन् । पनेरुका अनुसार निजामती सेवाका ६१ हजार कर्मचारी मात्र समायोजन गर्नुपर्ने देखिन्छ । मन्त्रालयका अनुसार प्रदेशमा आठ हजार १५५ र स्थानीय तहमा आठ हजार ५४७ जना मात्र समायोजन भएका छन् ।

सरकार र स्वतन्त्र मधेस गठबन्धनबीच ११ बुँदे सहमति
सरकार र स्वतन्त्र मधेस गठबन्धनबीच शुक्रबार ११ बुँदे सहमति भएको छ । प्रधानमन्त्री केपी शर्मा ओलीको उपस्थितीमा राष्ट्रिय सभागृहमा गृहमन्त्री रामबहादुर थापा र स्वतन्त्र मधेस गठबन्धनका तर्फबाट सीके राउतबीच सहमति पत्रमा हस्ताक्षर भएको हो । सहमतिमा राउतले मुलुकको अखण्डता स्वीकार गरेका छन् भने सरकारले गठबन्धनका कार्यकर्ताहरूमाथि लागेको मुद्दा फिर्ता लिने भएको छ ।

योसँगै स्वतन्त्र मधेश गठबन्धन बिघटन भएको छ । सरकारसँगको सहमति सँगै छुट्टै मधेस राज्यको माग गर्दै विभिन्न पृथकतावादी आन्दोलन गरिरहेका राउतले पृथकतावादी गतिविधि परित्यागको घोषणा गरेका छन् । कार्यक्रमलाई सम्बोधन गर्दै प्रधानमन्त्री केपी शर्मा ओलीले नेकपाको नामबाट विप्लव समूहले लुट मच्चाएको आरोप लगाए । उनले हत्या र विस्फोट गराउने पार्टी कम्युनिष्ट हुनै नसक्ने बताए । सत्तारुढ दल नेकपाभित्रै सरकारले सीके राउतसँग गरेको सम्झौताको विषयमा विवाद भएको छ ।

मेनपावर व्यवसायी रोहण गुरुङको बसुन्धारास्थित घरमा बम विस्फोट
मेनपावर व्यवसायी रोहरण गुरुङको बसुन्धरास्थित घरमा बम विस्फोट भएको छ । अज्ञात समूहले शुक्रबार साँझ उनको घरभित्र पार्किङ गरेर राखिएको कारमा बम विस्फोट गराएको महानगरीय प्रहरी परिसर काठमाडौंका प्रमुख एसएसपी बसन्त लामाले जानकारी दिए । 

उनका अनुसार बम विस्फोटबाट कार पूर्णरुपमा ध्वस्त भएको छ ।  गुरुङ वैदेशिक रोजगार व्यवसायी संघका अध्यक्ष समेत हुन् । विस्फोटपछि कारमा आगलागी हुन पुगेको थियो । आगलागी दमकल, प्रहरी र स्थानीयको सहयोगमा नियन्त्रणमा लिइएको जनाइएको छ । आगलागीबाट गुरुङको घरका साथै आसपासका केही घरमा सामान्य क्षति पुगेको जनाइएको छ ।  

सार्वजनिक यातायातमा आफूखुशी भाडा
कम्पनीमा दर्ता भई यातायात व्यवस्था विभागमा पञ्जीकरण भएका केही यातायात समितिले आफूखुशी सार्वजनिक यातायातको भाडा बढाउन थालेका छन् । विभागले भाडा नबढाए पनि व्यवसायीले आफूखुशी बढाएको भनी बढी भाडा लिन थालेका हुन् ।

बाबा गोकर्णेश्वर र सुन्दरीमाई यातायात कम्पनीका नाममा दर्ता भएका व्यवसायीले यसरी भाडा बढी लिएको यात्रुको गुनासो छ । बाबा गोकर्णेश्वर सञ्चालन हुने रत्नपार्क–साँखु, रत्नपार्र्क–दक्षिणकाली मार्गमा अन्य यातायातले भन्दा बढी लिइरहेको यात्रु रामचन्द्र सिम्खडाले बताए ।

रत्नपार्कबाट थलीसम्म बज्रयोगिनीलगायत अन्य कम्पनीका सवारीले रु २५ भाडा लिने गरेकामा बाबा गोकर्णेश्वरले रु ३० लिन्छ । साँखुसम्मको भाडा पनि अन्य सवारीको भन्दा रु पाँच बढी लिने गरेको उनले बताए । यसैगरी सुन्दरीमाई यातायात समितिले भने फागुन ७ गतेदेखि भाडा बढाएको भन्दै आफूखुशी भाडा लिन थालेको छ । 

यसअघि रत्नपार्क–सुन्दरीजलको भाडा रु २४ तोकिएकामा फागुन ७ गते बढाएको भन्दै रु छ बढीअर्थात् रु ३० असुल्न थालिएको यात्रु सविना घिमिरेले बताइन् । विभागले असोज ७ गतेपछि भाडा बढाएको छैन । कम्पनीका कार्यालय प्रमुख उपेन्द्र न्यौपाने भने विभागले असोज ७ गते गरेको भाडा वृद्धिकै आधारमा फागुन ७ गते समायोजन गरिएको दाबी गरे । असोजदेखि फागुन ७ गतेसम्म सुन्दरीमाई यातायातले तोकिएको भाडा रु २४ भए पनि रु २५ लिएर यो मार्गमा सवारी चलाउँदै आएको थियो । विभागको वेबसाइटमा अहिले पनि असोज ७ गतेपछि भाडा नबढाइएको उल्लेख छ ।

वेवास्था गरेको राजपाको आरोप
राष्ट्रिय जनता पार्टी नेपालले आफ्ना मागहरूप्रति सरकारले पटकपटक वेवास्ता गरेको आरोप लगाएको छ । काठमाडौंमा आयोजित कार्यक्रममा राजपाका शीर्ष नेताहरूले अधिकार प्राप्तिका लागि लड्ने चेतावनी दिए । राजपाका नेता रेशमलाल चौंधरीलगायतका नेता, कार्यकर्तालाई अदालतले गरेको जन्मकैदको सजायप्रति आपत्ति जनाउँदै उनीहरूले देशभर आन्दोलनमा जाने चेतावनी दिएका हुन् ।

कार्यक्रममा राजपा अध्यक्ष मण्डलका सदस्य महन्थ ठाकुर, अर्का सदस्य राजेन्द्र महतोले अधिकार प्राप्तीको आन्दोलनलाई शासक वर्गले दमन गरिरहेको उल्लेख गर्दै अधिकार प्राप्तिको आन्दोलनमा आउन सबैमा आह्वान गरे । टीकापुर घटनामा दोषी ठहर गर्दै अदालतले चौधरीलाई जन्म कैदको फैसला सुनाएपछि राजपा सरकारसँग रिसाएको छ । 

राष्ट्रिय गौरवका आयोजनामा समन्वयको अभाव
जग्गा प्राप्ति, वन क्षेत्रको जग्गा प्रयोग र रुख बिरुवा कटानजस्ता समस्याका कारण राष्ट्रिय गौरवका आयोजनामा आशातीत प्रगति हुन नसकेको पाइएको छ । सरकारी निकायबीचमा नै समन्वय हुन नसक्दा सरकारले प्राथमिकतामा राखेका र गौरवका आयोजनाका रुपमा चित्रण गरेका महत्वपूर्ण आयोजना लामो समयसम्म पनि अगाडि बढ्न नसकेको हो । 

अर्थ मन्त्रालयले हालै सार्वजनिक गरेको चालू आर्थिक वर्षको अर्धवार्षिक समीक्षामा जग्गा प्राप्तिका कारण धेरैजसो ठूला र महत्वपूर्ण परियोजना समस्यामा फसेको उल्लेख गरिएको छ । यस्तै निर्माण सामग्रीको अभाव, निर्माण व्यवसायीको फितलो अनुगमन र मूल्याङ्कन प्रक्रियाका कारण पनि महत्वपूर्ण आयोजनामा ठोस प्रगति हुन नसकेको समीक्षामा समेटिएको छ । धेरैजसो आयोजनामा प्राविधिक एवं दक्ष कर्मचारीको अभाव देखिएको छ भने भएका कर्मचारीलाई टिकाएर राख्ने चुनौती पनि उत्तिकै रहेको छ । 

कतिपय आयोजनाको निर्माण गर्ने ढाँचामा नै समस्या भएका कारण पनि जटिलता देखिएको छ । आयोजना शुरु गर्दा एक प्रकारको ढाँचा अवलम्बन गरिएको भए पनि पछिल्लो दिनमा आइपुग्दा थप स्पष्टता हुनुपर्नेमा त्यसो नभएको पाइएको हो । सरकारको आफ्नै समीक्षाअनुसार निर्माण व्यवसायीले समयमा काम नगर्दा कतिपय आयोजना सम्पन्न हुने समय सीमानै यकिन गर्न कठिनाइ भएको पाइएको छ । 

आयोजना कार्यान्वयनका लागि आयोजनासँग सम्बन्धित निकायको समन्वय बैठक हरेक महीना आयोजना गरी समस्या समाधानका लागिसमेत पहल हुनुपर्ने देखिएको अर्थ मन्त्रालयको समीक्षामा उल्लेख छ ।