०३ साउन २०८३, आइतबार
काठमाडौं – राष्ट्रिय जनता पार्टी (राजपा) ले मधेश थरुहट आन्दोलनबारे छानबिन गर्न सर्वोच्च अदालतका पूर्व न्यायाधीश गिरिशचन्द्र लाल नेतृत्वको आयोगको प्रतिवेदन सार्वजनिक गर्न माग गर्दै संसद् बैठक अवरुद्ध गरेको छ ।
प्रतिनिधि सभाको बुधवार बसेको बैठकको शुरूमै सभामुखसँग समय लिएर राजपाका राजकिशोर यादवले लाल आयोगको प्रतिवेदन सार्वजनिक नहुँदासम्म सदनको कारवाही अगाडि बढ्न नदिने बताए ।
यस अघिको बैठकमा आफूहरूको मागअनुसार सभामुखको रुलिङपछि गृहमन्त्रीले हल्का ढंगले जवाफ दिएको राजपाको आरोप छ ।
‘आयोगको प्रतिवेदन सार्वजनिक भएपछि राज्यको चरित्र उजगार हुने भएकाले सरकार प्रतिवेदन सार्वजनिक गर्न चाहँदैन,’ उनले भने ।
राजपाका सांसदहरूले उठेर विरोध जनाएपछि सभामुख कृष्णबहादुर महराले यस विषयमा सरकारलाई निर्देश गरिसकेकाले केही समय पर्खन आग्रह गरे ।
राजपाको विरोधपछि संसद् बैठक १० मिनेटको लागि स्थगित भएको छ ।
