कञ्चनपुर– बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्त प्रकरणमा कञ्चनपुरका पूर्व प्रहरी प्रमुख दिल्लीराज विष्टको थुनछेक बहस सकिएको छ । 
जिल्ला न्यायाधीश डा राजेन्द्र कुमार आचार्यको एकल इजलाशमा शुक्रबार पक्षविपक्षका कानुन व्यवसायीले थुनछेक बहस गरेका थिए । बहस सकिएपनि आदेश भने जारी गरिएको छैन। 
जिल्ला अदालत कञ्चनपुरका श्रेस्तेदार हरिकृष्ण अवस्थीले समय अपुग भएकाले शुक्रबारै आदेश जारी गर्न नसकिएको बताए । उनका अनुसार अदालतले आदेश जारी नगरेपछि पूर्वएसपी विष्टलाई प्रहरीकै जिम्मा लगाएको छ । आज प्रकाशित नयाँ पत्रिका दैनिकका अनुसार आइतबार आदेश जारी गरिनेछ ।