काठमाडौं – पाकिस्तानका प्रधानमन्त्री इमरान खानले कश्मीरको विवादित क्षेत्रका विषयमा भारतसँग शान्तिवार्ता यस क्षेत्रका लागि एकदमै महत्त्वपूर्ण कुरा भएको बताएका छन् । 

क्रिकेटरबाट राजनीतिकर्मी बनेका इमरान खान आठ महिनाअघि प्रधानमन्त्री बनेका हुन् । उनले आणविक शक्तिसम्पन्न छिमेकीहरूले मतभेदलाई कुराकानीमार्फत नै हल गर्न सकिने बताए । 

भारतप्रशासित कश्मीरमा हिंसाको घटना भएको केही हप्तापछि भारतमा आमचुनाव हुन लागेको छ । 

पुलवामामा भारतीय सुरक्षाबलमाथि आत्मघाती आक्रमण गरिएपछि भारतले पाकिस्तानको बालाकोटमा अतिवादीहरूको शिविरमा हवाई आक्रमण गरेको बताएको थियो । 

भारतका प्रधानमन्त्रीलाई के सन्देश दिन चाहनुहुन्छ भनी सोधिएको प्रश्नमा इमरान खानले बीबीसीका जोन सिम्पसनलाई भने, ‘कश्मीर मुद्दाको समाधान निकालिनुपर्छ र यस मुद्दालाई लामो समयसम्म चर्काइराख्नु हुँदैन ।’

उनले भने, ‘दुवै सरकारको पहिलो काम भनेकै गरीबी घटाउने र आपसी मतभेदलाई वार्तामार्फत हल गर्ने हो । त्यो मतभेदको विषय नै कश्मीर हो ।’

तर भारतका प्रधानमन्त्रीले चुनाव प्रचार अभियानमा पाकिस्तानविरोधी बयानबाजी गरिरहेका छन् र राष्ट्रिय सुरक्षामा जोड दिएका छन् । 

धेरै मानिसले यो चुनाव हिन्दू राष्ट्रवादी भाजपाको ध्रुवीकरण राजनीतिमाथिको जनमतसंग्रह जस्तो भएको बताए । 

बिहीवारदेखि मतदान शुरू हुन लागेको छ र मे महिनामा अन्तिम चरणको मतदान हुनेछ । 

बीबीसी विश्व मामिलाका सम्पादक जोन सिम्पसनका अनुसार, आठ महिनाको कार्यकालमा इमरान खानले एकदमै कम अन्तर्वार्ता दिएका छन् । त्यसैले उनले बीबीसी र अन्य बेलायती तथा अमेरिकी समाचार संस्थाको सानो समूहलाई भेट्न बोलाएपछि उनको उद्देश्य भारतको आमचुनावअघि एउटा सन्देश दिनु रहेको बुझिएको थियो । 

उनले भारतसँग मित्रताको हात बढाएको स्पष्ट थियो । 

इमरान खानले वातावरणलाई सहज बनाउने आवश्यकता अनुभव गरिरहेको कुरा साँचो हो । 

पाकिस्तानको अर्थव्यवस्था खराब छ । भारतसँगको तनावपूर्ण सम्बन्ध र आफ्नो इलाकामा अतिवादी मुसलमानी समूहलाई खुला छुट दिएको आरोपका कारण पाकिस्तानमा विदेशी लगानीकर्ता आउन चाहेका छैनन् । 

तर इमरान खानले जोड दिएर यी आरोपलाई अस्वीकार गरेका छन् । 

उनको दाबी छ, पहिलेका सरकारले अतिवादी समूहहरूमाथि यति ठूलो कारवाही गरेको थिएन । 

उनका लागि हरेक कुरा कश्मीर समस्याको समाधानमा निर्भर छ । 

भारत र पाकिस्तानले यसको कुनै समाधान खोजेमा अन्य सबै कुरा सजिलै हल हुन्छन् । 

इमरानले मंगलवार रोयटर्स समाचार संस्थासँग पनि कुराकानी गरे । उनले कुराकानीका क्रममा मोदी फेरि प्रधानमन्त्री बने भने शान्तिको सम्भावना झनै राम्रो हुने बताए । 

उनले भने, ‘दक्षिणपन्थी पार्टी भाजपाले जितेमा कश्मीरका विषयमा कुनै प्रकारको सम्झौता हुन सक्छ ।’

अन्य पार्टीहरू चाहिँ दक्षिणपन्थीहरूको आलोचनाको डरका कारण कुनै सम्झौता गर्न हिचकिचाउन सक्छन्, उनले बताए ।

बीबीसी हिन्दीबाट