२८ जेठ २०८३, बिहीबार
काठमाडौं – एक फेसबूक पोस्टका कारण श्रीलंकाको पश्चिमी तटीय शहर चिलामा आइतवार साँझ हिंसा भड्किएको छ । अनेकौं मानिसले मस्जिद र मुसलमान समुदायका पसलमा ढुंगामुढा प्रहार गरेको खबर छ ।
घटनापछि श्रीलंका सरकारले सामाजिक सञ्जालमाथि फेरि प्रतिबन्ध लगाएको छ ।
प्रहरी प्रवक्ता रुवान गुनशेखराले चिला इलाकामा कर्फ्यु लगाइएको बताए । श्रीलंकामा शृंखलाबद्ध आक्रमणपछि स्थिपत अझै पनि सामान्य हुन सकेको छैन ।
प्रवक्ताले भने, ‘स्थिति नियन्त्रणका लागि चिला इलाकामा तत्कालै लागू हुने गरी कर्फ्यु लगाइएको छ ।’ अहिले चाहिँ कर्फ्यु खोलिएको छ ।
विवादास्पद फेसबूक पोस्टमा ‘हामीलाई रुवाउन गाह्रो छ’ भन्दै मुसलमान समुदायविरुद्ध बयानबाजी गरिएको छ । पोस्ट स्थानीय भाषामा लेखिएको छ । त्यसमा एक मुसलमान नाम भएका प्रयोगकर्ताले लेखे, ‘धेर नहाँस, एक दिन तिमी रुनेछौ ।’
स्थानीय प्रशासनका अनुसार, फेसबूक प्रयोगकर्तालाई पक्राउ गरिएको छ । उनको नाम हमीद मोहम्मद हसमार हो । उनी चिलामै बस्छन् । त्यहाँ इसाइ समुदायका मानिसको बाहुल्य छ । क्रुद्ध भीडले आरोपितलाई बेस्सरी पिटेको छ ।
एक स्थानीय मुसलमान युवकले नाम नछाप्ने शर्तमा भने, ‘त्यसपछि केही मानिसले मस्जिद र मुसलमान युवकहरूमाथि ढुंगामुढा गरे । अहिले स्थिति नियन्त्रणमा छ तर राति डर लाग्छ । एउटा मस्जिदमा निकै तोडफोड भएको छ ।’
केही मानिसले मुसलमानको पसलमा ढुंगा हानेको भिडियो सामाजिक सञ्जालमा भाइरल बनाइएको छ ।
सरकारले आतंकवादीहरूलाई पक्रिन नसकेको भन्दै क्ही समुदायहरूले चिन्ता व्यक्त गरेका छन् ।
श्रीलंकामा तीन हप्ताअघि चार होटल र दुई चर्चमा भएका विस्फोटमा २५० भन्दा बढी मानिसको मृत्यु भएको थियो । आक्रमण आतंकवादी समूह इस्लामिक स्टेटले क्रिस्चियनहरूको पवित्र पर्व ईस्टरमा गराएको थियो ।
एजेन्सी
