०७ असार २०८३, आइतबार
काठमाडौं – आइतवार साँझ राजधानीमा भएको शृंखलावद्ध विस्फोटले सुरक्षा निकायमाथि प्रश्न उठेको भन्दै कांग्रेस सांसदले संसदमा खबरदारी गरेका छन् ।
सोमवार संसदमा बोल्दै नेपाली कांग्रेसकी नेतृ सुजाता परियारले सरकारले झूटो आश्वासन मात्र दिएको टिप्पणी गरिन् ।
‘गृह प्रशासन के हेरेर बसिरहेको छ ?’ परियारले प्रश्न गरिन्, ‘सरकारले सुरक्षा दिन सकेको छैन । झूटो आश्वासन मात्र दिएको छ र त्यसैलाई सुरक्षा मजबुत भएको भनेर भन्न मिल्छ ?’
आइतवार साँझ राजधानीमा भएको शृंखलाबद्ध विस्फोटमा ४ जनाको मृत्यु भएको थियो भने ८ जनाभन्दा बढी घाइते भएका थिए । विप्लव समूहले गराएको भनिएका विष्फोट पहिल्यै रोक्न पहल नगरेको भन्दै सरकारको सुरक्षा व्यवस्थामा प्रश्न उठिरहेको छ ।
