कपिलवस्तु– इस्लाम धर्मालम्बीहरूको महान चाड इद उल फित्रको अवसरमा नेपाली कांग्रेसका नेता एवं पूर्वराजदूत दीपकुमार उपाध्यायले ‘इद मुबारक’ मनाएका छन् ।

गृहजिल्ला कपिलवस्तुका विभिन्न बस्तीमा गएर उपाध्यायले इस्लाम समुदायका नागरिकसँग इदको शुभकामना बाँडेका हुन् । 

‘हाम्रो चाडपर्वमा उहाँहरूले शुभकामना दिनुहुन्छ, उहाँहरूको चाडमा शुभकामना दिन गएको हुँ, बिहान एक ठाउँमा गएको थिएँ, अहिले तौलिहवा नजिकै छु, बेलुका पनि एउटा गाउँमा जाँदैछु,’ उपाध्यायले लोकान्तरसँग भने ।

भारतका लागि पूर्व नेपाली राजदूत समेत रहेका उपाध्याय पछिल्लो समय जिल्लामा बसेर विकास निर्माणको काममा केन्द्रीत हुँदै आएका छन् । उनी विगतमा कपिलवस्तुबाट संविधानसभा र प्रतिनिधि सभामा निर्वाचित भएका थिए ।