नेपाली पाइलट हुँदाहुँदै नेपाल वायुसेवा निगमले वाइडबडी र न्यारोबडी जहाजमा ११ जना विदेशी पाइलट लिएको छ ।

 प्रतिपाइलट मासिक २० हजार डलर तलब दिइएको छ । उनीहरूका लागि  दुई करोड ४२ लाख रुपैयाँ मासिक फजुल खर्च भइरहेको छ । एयरबस ३२० (न्यारोबडी) जहाजका लागि १६ जना क्याप्टेन र १६ जना नै कोपाइलट चाहिन्छ । अहिले न्यारोबडीमा २३ जना क्याप्टेन र १० जना मात्र कोपाइलट छन् । अर्थात् न्यारोबडीका लागि चाहिनेभन्दा ६ जना बढी क्याप्टेन छन् । तीमध्ये तीनजना विदेशी हुन्, तर एयरबस ३३० (वाइडबडी) मा १८ जना क्याप्टेन र १८ जना कोपाइलट चाहिन्छ । तर, निगमसँग १२ जना क्याप्टेन र ११ जना कोपाइलट मात्रै छन् । क्याप्टेनमध्ये चारजना नेपाली हुन् भने आठजना विदेशी हुन् । तर, न्यारोबडी उडाइरहेका पाइलटलाई एक साताको तालिम दिएर वाइडबडीमा सार्न सकिन्छ । ‘प्रतिक्याप्टेन २० हजार अमेरिकी डलर तलब दिएर आठजना विदेशी क्याप्टेन राखिएको छ । उनीहरूलाई वाइडबडीमा सार्न सकिन्छ । न्यारोबडीमा पनि तीनजना विदेशी पाइलट छन्,’ स्रोतले भन्यो, ‘यो सीधासीधा आर्थिक चलखेल हो ।’ नयाँ पत्रिकामा खबर छ ।