०१ असार २०८३, सोमबार
काठमाडौं–सरकारले ल्याएको विधेयक पञ्चायतका राजाले ल्याउने खालको भन्दै त्यो विधेकयले आफूहरूलाई फसाउने खतरा रहेको टिप्पणी गरेका छन् ।
आर्थिक विधेयक २०७६ माथिको सैद्धान्तिक छलफलमा भाग लिँदै नेमकिपा सांसद प्रेम सुवालले युगान्तकारी परिवर्तनबाट आएको सरकारले पञ्चायतका राजाले जस्तो विधेयक ल्याएको आरोप लगाएका हुन् ।
‘स्वास्थ्य जोखिम करका नाममा सरकारले सुर्तीजन्य वस्तुमा कर उठाउने प्रस्ताव गरेको छ । जुन चिज खानै हुँदैन, क्यान्सरको कारक हो, त्यो चिज खुवाउने र त्यसमा कर लिने ? यस्तो विधेयक समर्थन गरेर पास गरे सबै सांसद दोषी हुन्छौं । त्यसमा सचेत हुनुपर्छ,’ सांसद सुवालले भने, ‘नाफका लागि सर्वसाधारणको स्वास्थ्यमा हानी हुने काम गर्ने बन्दोबस्त पूँजीवादी व्यवस्था हो । यो सरकारले आफूलाई युगान्तकारी परिवर्तनबाट आएको दाबी गर्छ । विधेयक हेर्दा पञ्चायतको राजाको जस्तो छ, त्यही हो शीर्षकहरू । यस्तो विधेयक पारित गराएर हामी सांसदहरूलाइ सरकारले फसाउने स्थिति देखियो, त्यसमा सचेत हुनुपर्छ ।’
छलफलमा उठेका प्रश्नको जवाफ दिँदै अर्थमन्त्री डा. युवराज खतिवडाले सुर्ती र मदिरा बेचबिखनमा प्रतिबन्ध लगाउने अवस्था नरहेको बताए । ‘समाजका लागि यी चिजहरू सर्वस्वीकार्य नहुन सक्छन्, पूर्णतः उन्मुक्त रहने अवस्था पनि रहेन । सकेसम्म सुर्ती र मदिरा नखाऔं, नभए सकेसम्म उच्च कर लिऔं’ उनले भने ।
छलफलमा भाग लिँदै कांग्रेसका मीनेन्द्र रिजालले सरकारले लिएको राजस्वको लक्ष्य पूरा हुनेमा शंका व्यक्त गरे ।
