काठमाडौं– विकसित पछिल्लो राजनीतिक घटनाक्रमको समीक्षा तथा पार्टीका विभिन्न विभाग गठनबारे निर्णय लिन सत्तारुढ नेपाल कम्युनिष्ट पार्टी (नेकपा)को सचिवालयको बैठक बसिरहेको छ । 

प्रधानमन्त्री निवास बालुवाटारमा आइतवार दिउँसो पौने २ बजेदेखि बैठक बसेको हो । गएको मंगलवार अध्यक्षद्वय केपी शर्मा ओली र पुष्पकमल दाहाल 'प्रचण्ड'बीच भएको सहमतिलाई अन्तिम रूप दिन सचिवालय बैठक बसेको हो ।

मंगलवार दुई अध्यक्षबीच गठन गर्न बाँकी रहेका विभाग गठनमा सहमति भएको महासचिव विष्णु पौडेलले जानकारी दिए । नेताहरूले असार मसान्तभित्र पार्टी एकताको काम टुंगो लगाउने बताउँदै आएका थिए । 

सहमति अनुसार पार्टीको महत्वपूर्ण संगठन विभागको संयोजकको जिम्मा वामदेव गौतमले पाउने निश्चित भएको छ । अध्यक्षद्वयबीच भएको सहमतिलाई सचिवालयले अनुमोदन गरेपछि स्थायी समिति बैठकमा लगेर पारित गराउने तयारी भएको छ । 

बैठकमा अध्यक्षद्वय ओली र प्रचण्ड सहित सचिवालयका अधिकाशं सदस्य उपस्थित छन् । सचिवालय सदस्य समेत रहेका गृहमन्त्री रामबहादुर थापा बादल भने सचिवालय बैठक शुरू हुँदासम्म बैठक स्थलमा पुगेका छैनन् ।