काठमाडौं – अमेरिकाको क्यालिफोर्नियामा सोमवार भएको गोलीकाण्डमा तीनजना मारिएको र १५ जना घाइते भएको प्रहरीले पुष्टि गरेको छ । गिलरोय लसुन महोत्सवमा एक आक्रमणकारीले अन्धाधुन्ध गोली चलाएका थिए । 

आक्रमणकारीलाई प्रहरीले गोली हानेर मारेको छ । 

गिलरोयका प्रहरी प्रमुख स्कट स्मिथीले यो वार्षिक पारिवारिक समारोहमा सुरक्षा उपलब्ध गराइएको अनि झोलाहरू प्रवेशद्वारमा जाँच गरिएको बताए । तर आक्रमणकारीले पर्खालमा प्वाल पारेर प्रवेश गरेको देखिएको छ । 

आक्रमणकारीको पहिचान र नियत खुलेको छैन र उनले अन्धाधुन्ध राइफलबाट गोली प्रहार गरेको स्मिथीले बताए । 

दोस्रो आक्रमणकारी पनि घटनामा संलग्न रहेको बताइएपनि यसको पुष्टि हुन सकेको छैन । 

‘हाम्रो टोली दोस्रो आरोपितका विषयमा आएका सूचना अनुसार अघि बढिरहेको छ,’ स्मिथीले भने ।

घटना भएको लगभग तीन घन्टापछि उक्त क्षेत्रमा थप गोली प्रहार भएको पत्रकार एलिसा ह्यारिङटनले ट्वीट गरिन् । 

तीन दिनसम्म चल्ने गिलरोय लसुन महोत्सव अमेरिकाको सबभन्दा ठूलो वार्षिक खाना महोत्सवमध्ये एक हो । यो क्यालिफोर्नियाका सान होसेबाट ३० माइल दक्षिणपूर्वमा आयोजना गरिन्छ । आइतवार महोत्सवको अन्तिम दिन थियो ।

एजेन्सी