१८ असार २०८३, बिहीबार
काठमाडौं – बालबालिकाले एक वर्षको उमेरदेखि नै न्यायको अनुभव गर्ने र गलत गर्नेहरूलाई सजाय दिइएको हेर्न चाहेको एक अध्ययनले देखाएको छ ।
कुल १२० बालबालिकामाथि गरिएको अध्ययनमा नियम तोड्नेलाई मातापिता र शिक्षक जस्ता ठूला मान्छेले कारवाही गर्ने अपेक्षा १६ देखि १८ महिनाका बालबालिकाले राखेको पाइयो ।
वाक्यगठन गर्ने क्षमता विकसित हुनुअघि बालबालिकाले के सही हो र के गलत हो भन्ने बुझ्छन् र ठूलाले यसमा कारवाही गर्नुपर्ने अपेक्षा राख्छन् ।
अनुसन्धानकर्ताहरूले बालबालिकालाई टेड्डी बीयरहरूको कठपुतली शो देखाए । त्यसमा गलत गर्ने टेड्डीले सबै खेलौना आफैं लिएर अरूलाई छुन नदिएको देखाइयो ।
मातापिताको भूमिकामा रहेको ठूलो टेड्डीले यो व्यवहारलाई सजाय नदिएकोमा बालबालिकाले लामो समय घुरेर हेरेको पाइयो । उनीहरूले यसमा कुनै किसिमको कारवाही हुनुपर्ने अपेक्षा गरिएको देखियो ।
तर ठूलो टेड्डीले हस्तक्षेप गरेर खेलौना नपाएको टेड्डीलाई खेलौना दिलाएपछि बालबालिकाले नौ सेकेन्ड अगावै अन्त हेर्न थाले अर्थात् उनीहरूलाई यो घटनाक्रम अपेक्षाअनुरूप नै भएको लाग्यो ।
मनोविज्ञान प्राध्यापक रेनी बाइलारजीयनले इलिनोई विश्वविद्यालयमा यो अध्ययनको नेतृत्व गरेकी हुन् । उनले् भनिन्, ‘ठूलाले गल्तीलाई बेवास्ता गर्दा बालबालिकाले लामो समय घुरेर हेरे भने गल्तीलाई सुधार्दा लामो समय हेरेनन् ।
ठूलाले हस्तक्षेप गरेर गलतलाई सही बनाउने अपेक्षा बालबालिकाल गरे अनि यस्तो काम नगर्दा उनीहरू आश्चर्यचकित भए ।’
एजेन्सी
