काठमाडौं, १४ चैत — भारत र चीन लगायतका देशबाट अमेरिकाका विश्वविद्यायहरूमा भर्ना हुन निवेदन दिने विद्यार्थीहरूको संख्यामा कमी आएको एक सर्वेक्षणले देखाएको छ ।
डोनाल्ड ट्रम्प प्रशासनले केही देशका मानिसलाई अमेरिका आउन प्रतिबन्ध लगाएको अनि अमेरिकामा विदेशीहरूलाई स्वागत गर्न छोडिएकाले भर्ना घटेको हो ।
२५० वटा कलेजको सर्वेक्षण गरी निकालिएको निष्कर्षलाई घोषणा गर्दै अमेरिकन एसोसिएसन अफ कलेजिएट रजिस्ट्रार्स एन्ड एडमिसन्स अफिसर्सले भन्यो, ‘लगभग ४० प्रतिशत अमेरिकी कलेजमा विदेशी विद्यार्थीबाट भर्ना आवेदनको संख्या घटेको छ र विद्यार्थी अनि उनीहरूका परिवारले अमेरिकामा कम स्वागत पाएको जस्तो लागेको बताएका छन् ।’
मध्यपूर्वको देशबाट अमेरिकामा भर्ना निवेदन दिनेहरूको संख्या सर्वाधिक घटेको छ किनकि ट्रम्पले मुसलमानबहुल देशका नागरिकलाई अमेरिका प्रवेशमा प्रतिबन्ध लगाएका छन् ।
अन्तर्राष्ट्रिय विद्यार्थीहरूमा भारत र चीनबाट ४७ प्रतिशत अमेरिका पुग्छन् तर यिनको संख्यामा उल्लेख्य कमी आएको छ ।
चीन, भारत र नेपालमा रहेका अमेरिकी राजदूतावासले विद्यार्थीलाई प्रवेशाज्ञा नदिने गरेको अनुभव भएको विद्यार्थीहरूले महसूस गरेको सर्वेक्षणमा पाइएको छ । भिसा प्रणालीमा गरिएको कडाइले गर्दा नेपालीहरूलाई पनि अमेरिका प्रवेश गर्न गाह्रो भइरहेको विज्ञहरू बताउँछन् ।
हिन्दुस्तान टाइम्सबाट
