काठमाडौँ - सरकारले हालै ल्याएको गुठी विधेयकको सन्दर्भमा गुठीयारबीच छलफल चलाउन तथा विभिन्न कार्यक्रम सञ्चालन गर्न गुठीयारहरुको एक कार्यसमिति गठन गरेको छ ।

काठमाडौँको ओलम्पस क्लबमा नेवार समुदायका विभिन्न खलः तथा पुचः सम्मिलित बैठकले समितिको अध्यक्षमा डा महेशमान श्रेष्ठ र उपाध्यक्षमा पवित्र बज्राचार्यलाई चयन गरेको छ ।

सचिवालय हेर्ने जिम्मेवारी नेवाः देय् दबूका अध्यक्ष नरेश ताम्राकारलाई दिइएको छ । सदस्यहरुमा क्रमशः ललितपुरबाट नानीकाजी शाक्य, रवीन्द्र ताम्राकार, सबिना महर्जन, ऋषिप्रसाद श्रेष्ठ, भक्तपुरबाट श्याम शिल्पकार, शान्तप्रकाश श्रेष्ठ, टोखाबाट श्रीकृष्ण मानन्धर, फम्पी सङ्घर्ष समितिबाट रोशन श्रेष्ठ र सक्व सङ्घर्ष समितिबाट राजा श्रेष्ठलाई चयन गरिएको छ ।

यस्तै खोना सङ्घर्ष समितिबाट नेपाल डङ्गोल तथा अशोक महर्जन, कीर्तिपुरबाट श्रीकृष्ण महर्जन, काठमाडौँबाट राजभाइ जकःमि, नानीहेरा महर्जन, सुमन सायमी, रवीन्द्र श्रेष्ठ, गणपतिलाल श्रेष्ठ, सुजीव बज्राचार्य, उमेश स्थापित, भगवान् शाक्य, रमेशमान पिया र सुरेश किरण मानन्धरलाई चयन गरिएको छ ।

समितिको सल्लाहकारमा वाङ्मय शताब्दी पुरुष सत्यमोहन जोशी, जनकवि दुर्गालाल श्रेष्ठ, हितकरवीरसिंह कंसाकार, मल्ल के सुन्दर, डा पुष्पराज राजकर्णिकार र चन्द्र महर्जन रहनुभएको छ ।