गुल्मी, चैत्र–१५ - गुल्मीको दर्लामचौरका एक व्यक्ति विपन्नताका कारण श्रीमतिको उपचार गर्न नसकेर घरबाट फरार भएका छन् ।

इश्मा गाउँपालिका अन्तर्गत साविकको दर्लामचौर ८ सेनखण्डका ४० वर्षीय मंगल नेपाली श्रीमति पार्वतीको उपचार गर्न नसकेर फरार भएका हुन ।

स्थानी प्रेम भुसालका अनुसार मुटु सम्वन्धी रोगले ग्रस्त भएकी श्रीमति पार्वतीलाई जिल्ला अस्पतालले पाल्पा रिफर गरेको थियो ।

तर उनका श्रीमानले उपचार गर्ने खर्च नभएका कारण श्रीमतिलाई घर फर्काएका थिए ।

घरमा विरामी श्रीमतिको हेरचाह गर्नु पर्ने ठाउँमा १५ वर्षिय र ११ वर्षिय दुई छोराहरुलाई समेत संगै लगेर उनी चैत ९ देखि फरार छन् । त्यसको दुई दिन पछि पार्वतीको मृत्यु भएको छ ।

पार्वतीको निधन भएको पाँच दिन सम्म पनि काजकिरिया हुन सकेको छैन । उनका श्रीमानको खोजी गरिएपनि उनी फेला पर्न सकेका छैनन् ।

घरमा रहेकी पाँच वर्षकी छोरीलाई गाउँलेले पालेर राखेका छन् ।

गाउँलेहरुले उनको उपचारको लागि चन्दा उठाएका थिए । तर त्यो रकमले थेगेन ।

उपचार गर्ने रकम नहुँदा ३० वर्षको अल्पायुमै पार्वतीको निधन भएको हो ।

-गुल्मीबाट अनिश गैरेकाे सहयाेगमा